Kapenduanna Suha'na Yohanes
Bätäna issinna
Inde suha' natuli' Yohanes to disangai “Pebaba Ada'” napakatuam mesa jumaa'.
Illaam inde suha' dua kaha-kaha napelau to untuli'i. Uhuna, ingganna to umbatai la sikamase mesa sola mesa. Kapenduanna, la unjagai to umbaba pepa'guhuam mebaba bulim, anna ingganna pepa'guhuam tää'na sihondoi pepa'guhuanna Kristus.
Lesoanna issinna
1. Kada passu'bä' (1:1-3)
2. Pa'kamase lako solata anna la dipasikambela kale to umbaba pepa'guhuam sala (1:4-11)
3. Kada pebubum (1:12-13)
1
1 Kao Pebaba Ada' untuli'i inde suha' lu lako jumaa'* jumaa': Indo dituli' illaam basa Yunani, naua ia ke basa Bambanni: Indo'... sola änä'mu, kiha-kiha jumaa' nauaam. to napilei Puang Allataala. Kukamasei si'da-si'dakoa', tä' kao mandi, sapo' moi duka' ingganna to ungkalesom kamaloloanna Puang Allataala, 2 aka kamaloloam ia too tohho illaammi kaleta, anna la tontä lium illaam kaleta sule lako salako-lakona.
3 Handandanni Puang Allataala Ambeta anna Yesus Kristus Änä'na la untamba'kia' anna nakamasei sola namana' kamasakkeam sola kamasannangam. Ingganna ia too tipungngu' anna tandaam illaam kamaloloam anna pa'kamase.
Pa'kamase lako solata anna la dipasikambela kale to umbaba pepa'guhuam sala
4-11
4 Tä'um deem la susi katilallasangku tappana kuissam deemmi illaam alla'-alla'mua' ma'palako situhu' kamaloloam, umba susi puha napahentaangkia' Ambeta. 5 Anna temo deem la kupelaua' matim: Kela mala anna sikamase liukia' mesa sola mesa. Inde kutulisangkoa' taia pahenta maneanna ditula', sapo' pahenta puhangkia' ditulasam pahandu'na anna ungkatappa'ikia' Puang Yesus.
6 Indo diuaam pa'kamase, kalembasanna untuhu'i ingganna pahentana Puang Allataala. Iya indo pahenta puhaa' uhhingngi pahandu'na anna ungkatappa'ikoa' Puang Yesus naua: La ungkamasei liukoa' solamu.
7 Aka budam to mebaba bulim kende' anna lao ma'patudu lako inde lino. Indo tau ia too tä' naakui naua: “Puham sule inde lino Yesus Kristus mehhupatau.” Tau susi ia too mebaba bulim anna to umpobali Kristus. 8 Dadi la unjagai manappakoa' kalemu indana labu'i indo pengkähäki. Anna mala untahima asanna' sahomu indo la nabeengkia' Puang Allataala. 9 Menna-menna tä' muanda'i pepatuduanna Kristus, sapo' ia pole hi uhhängännii pikkiham di kalena, tau ia too tä' deem kasilombunganna Puang Allataala. Sapo' menna-menna muanda'i manappai pepatuduanna, la deem ia kasilombunganna Puang Allataala Ambeta sola Änä'na. 10 Maka' deem sule tau umpellambi'ikoa' umbaba pepa'guhuam sulibanna pepa'guhuanna Kristus, daa untahimai illaam banuammu tau ia too, anna daa umbeennia' lindo malute. 11 Aka menna-menna umbeenni lindo malute, tau ia too mangngala tabam duka' illaam pengkähängam kadakena.
Kada pebubum
12-13
12 Moinna anna budapi la pahallu kutulasangkoa', sapo' mokaä' umpaillaam asanni inde suha', aka maelo' siamä' la matim anna sipekaleangkia' sipa'tula', anna mala sumpu katilallasantaa' pada-pada.
13 Salama'na duka' matim solasubummu inde jumaa'.† solasubummu inde jumaa': Indo dituli' illaam basa Yunani, naua ia ke basa Bambanni: änä'na solasubummu, kiha-kiha indo jumaa' naongei Yohanes.
Padam too.