О дилэс э апостоленги
Багалыдэс амала!
Тумэ астарэн андэ васта книжка, сави си дуе которэндар: «Евангелия катар Лука» тай «О дилэс э апостоленги». Он ли о дуй сас яздимэна екхе манушэса, сиклярдэса э Исусескерэса э Лукаса, тай си о котора э Библияки, о Зборэс э Дэвлэски. Сам э Библия палящиелпэс дуе барэ которэнги: «Пурано Завети» тай «Нэво Завети». Андэ «Пурано Завети» пхукавдёл катар ангалуно бэшыпэ опэр пху тай катар дюняс ки Израилеско, саво си никалдо э Дэвлэса. Андэ «Нэво Завети» си яздимэ катар бэшыпэ ки Исусеско Христоско, генэ пхукавдёл, сар э кхангири аракхлили тай лиляс тэ барёл опэр алаи ки пху.
Сам э збора «Евангелия» си о «Лошано Габэри». Адава габэри одолэстар, кай дуй биня брэш палэ андэ дюняс ало о Исус Христос, кай бучёл Кутардимари, одолэстар, кай Ов бэшэлас амэнца, аиндэрдиелас тай сиклярэлас э дюняс, мукелас лэнги бэзя, муло андар алаи ко мануша тай дживиндило, тай генэ одолэстар, кай Ов генэ кан авэл андэ дюняс.
Э Евангелиес улэ андэ баштутно веки амари эра тай сас яздимэна опэр гречески чиб. Штар Евангелиес, яздимэна апостоленца э Исусескерэнца (э Матфееса тай э Иоаннеса) тай э чяче амалэнца апостоленгерэнца (э Лукаса тай э Маркеса), эси тап ангал андэ Нэво Завети. Пал лэндэ джял книжка «О дилэс э апостоленги». Андэ латэ пхукавдёл одолэстар, сар тхэдэ э Исусеса апостоля гелэнас о Лошано Габэри э Дэвлэско, тай генэ одолэстар, сар овэнас ангалунэ кхангеря. Генэ андэ 1 веки улэ о письмадэс э сиклярдэнги э Исусескерэнги тай э книжка э «Гаравди Збора». Алаи адала книжкес сас кидинэ екхетханэ андэ екхе книжкатэ, сави бучёлас «Нэво Завети», андэ савэстэ си 27 книжкес тай о письмадэс.
Авдес о книжкес э Нэвэ Заветески, ай май зиядэ э Евангелия, яздимэна пощи опэр алаи ко чиба ки дюняски, кастэ си яздипэ. Кай си андар екх пурано яздипэ о манушыкано, э Библия си сами джянли книжка андэ дюняс. Амэ джянас, кай ли тумэ кан гинэн багалыс адала лаче яздиматэс пуранэ дилэс.
Амэ дас амари патюв э переводчикен, редакторен тай бутэ ромэн, — алаен, кон кердяс ярдыми тэ никлёл адая книжка. Бах мэ дэл тумэн о Дэл!
Лачипэ тумэнги катар Дэл!
Патюваса,
О бутярнэ э организацыяки «Переводчикя Библиякерэ Украинаки»
1
О Исус ваздэлпэс опрэ
1 Намлысана Феофил, андэ мэ баштутнэ пхукаимастэ мэ яздым алаестар, со о Исус керэлас тай со Ов сиклярэлас 2 джи одолэ десески, кана андар Шужо Духос пхэнляс э тхэдэнги Лэса апостоленги, со он камэл тэ керэн, тай Ов сас линдо опрэ. 3 Пал Пэ хурлукестэ Ов уло ангал лэндэ дживиндо тай сикавдяс дилэнца, кай си адава чячипэ. Саранда дес о Исус авэлас лэндэ тай пхэнэлас катар Дэвлэско Патишайлыки. 4 Екхвар, кана о апостоля сас екхетханэ, Ов пхэнляс лэнги тэ на ачявэн о Иерусалими, ами тэ ишандиен, со пхэнлило сас э Дадэса.
— Адава одова си, со тумэ шунлянус Мандар. 5 Вай о Иоанн болэлас панеса, ай тумэ пал набут дес кан овэн болдэ э Шужэ Духоса.
6 Одола кон сас отхэ, он лилэ тэ пхучен Лэс:
— Сагбуса, та со, Ту мангес тэ керэс анкха о патишайлыки э Израилеско, сар сас буруни?
7 Ов пхэнляс лэнги:
— На тумари дила си тэ джянэн о вахыти тай о деса, савэ о Дад тхэдяс Пэ зораса.
8 Ай кана опэр тумэндэ кан фулел о Шужо Духос, тумэ кан лэн зор тай Мандар кан пхукавэн андэ Иерусалими, алаи ки Иудея, андэ Самария тай джи ко чети ки пхуяко.
9 Кана Ов пхэнляс адава, ангал лэнги якхендэ сас ваздино опрэ, тай о булути гаравдяс Лэс лэнги якхендар.
10 Он доврус дикхенас опрэ, бискай Ов ваздиндёлас, сар бирдэн паш лэндэ улэ дуй мануша андэ парнэ савутендэ.
11 — Галилеяня, — пхэнлэ он, — со тумэ санус тэрдэ кай дикхен опрэ? Адава о Исус, Саво сас линдо тумэндар опрэ, кан авэл палэ аякха, касавкес тумэ дикхлянус Лэс, сар Ов гело опрэ.
Тхэдипэ нэвэ апостолеско ко тхан ки Иудаско
12 Пал отхэ он алэ андэ Иерусалими опрал горас, кай бучёлас Маслинэнго, сави сас надур катар диз, о дурипэ э дромэско, кай муклёлас тэ накхес субботако дес. 13 Он алэ андэ кхер тай ваздинэпэс опрэ, катэ он бэшэнас. Отхэ сас о Пётар тай о Иоанн, о Яков тай о Андрей, о Филипп тай о Фома, о Варфоломей тай о Матфей, о Яков, о чяво э Алфееско, о Симон Зилот тай о Иуда, о чяво э Яковеско. 14 Алаи он кидэнаспэс екхетханэ тэ зборизэн э Дэвлэса. Лэнца сас набут джювля, э дай э Исусески э Мария тай Лэски пхрала.
15 Андэ одола деса о Пётар ущино машкарэ ко пхрала ко пакялэ (отхэ сас шэлубиш мануша) тай пхэнляс:
16 — Пхралалэн, камэлас тэ овэл, со си яздимэ, катэ о Шужо Духос пхэнляс андар Давид катар Иуда, саво гелэлас одолэн, савэ джянас тэ лэн э Исусес. 17 О Иуда сас о екх андар амэндэ тай керэлас амэнца о хэзмэти э апостоленго. 18 (Э ловэнги, савэ лиляс андар пэ канлыкестэ, ов киндяс ливади, ай аякха лачес пэло ки пху, лэстэ пхаро о пэр тай со сас андэ пэр никлисто аври. 19 Адалэстар галилэ алаи, кон бэшэлас ко Иерусалими, тай тхэдэ э ливади опэр пумарэ чибатэ Акелдама, самким «Ратэскири ливади».) 20 Вай андэ книжка ки Псаломенги си яздимэ:
«Мэ овэл лэско кхер чючё,
мэ на бэшэл никхон андэ»
тай
«Авэр мэ лэл лэско тхан».
21 Оничин амэнги камэл тэ лас екхес андар одолэ манушэндэ, савэ сас амэнца алаи одова вахыти, кана о Сагбус Исус сас машкарэ амэндэ, 22 одолэ вахытестар, кана о Иоанн болдяс э Исусес, джи одолэ десески, кана о Исус сас линдо амэндар. Ов, сар амэ, камэлас тэ дикхел, кай Ов дживиндило.
23 Пхэнлэ дон: э Иосифес, савэски генэ пхэнэн Вар-Савва я Юст, тай э Матфиес. 24-25 Тай пхэнлэ э Дэвлэски:
— Сагбуса, Ту джянэс о ило кажнеско. О Иуда ачявдяс э апостоленго хэзмэти тай гело отхэ, кай камэлас тэ джял. Сикав амэнги, кас андар адалэ дондэ ту тхэдян лэски тханэстэ.
26 Оничин он читэ жреби, тай пэло опэр Матфий, тай ов сас тхэдо ко дэшуекх апостоля.