4
Deus ize ato araba Jesus aitoem, Satanás aiese kehobyry
(Mc 1.12-13; Lc 4.1-13)
1 Ilâpyryem myani Jesus adaholy Deus Ispirituryam âji âdy peba atoram. Tarâ myani Deus izepa ato anhetoem Satanás aiese kely wâne. 2 Quarenta iguandyly, quarenta emedyly warâ myani Jesus nâwinduapyra awyly. Alâ myani toenzepa kehoem ewindupadyly. 3 Aituo Satanás eyam saindyly, aguely:
— “Deus imery urâ” mygueansema. Âkealâ kuru amyguely-ro watay, awârâ tuhu pãoem iekâ pylâ — kely.
4 Aituo myani Jesus aguely:
— Amyguehobyry agânhetaymba ise urâ.
“Pão kiendawynlygue lelâ inkâba kyiguepa kydawyly.
Idânârâ Deus agueho kieinwândyly, aguiendyly warâ watay,
kyiguewâpyra kurâ”
kely mawânrâ Deus itaumbyry awo wâgâ iweniby — kely Jesus.
5 Ilâpygueduo myani Satanás, Jesus nhadyly Jerusalémram. Deus ijidadâry kelygue tâzekeim myani mârâ xidadâ. Deus ety nhangakuedaji myani nhadyly. 6 Aituo aguely:
— “Deus imery urâ” mygueansema. Âkealâ kuru amyguely-ro watay, tarâpa onro onwa adamegâ. Mâdyâwâpyra ise âmâ. Warâ mawânrâ iwenibyem Deus itaumbyry awo wâgâ:
“Deus nhese lelâ.
Anju domodo igonose awâniem.
Âihugueduo, awâse lelâ tâmarygue,
âda mipyra mitoem, âhuru tuhu onwa nâdyâpa itoem warâ”
kely iwenibybe mawânrâ — kely Satanás.
7 Aituo myani Jesus eyam aguely:
— Onro onwa kadamewâbyra ise urâ. Warâ lâpylâ iwenibyem awyly Deus itaumbyry awo wâgâ:
“Deus imakelymo mâentomoem kulâ, kâmayno akâiedaundâ.
Amidylymo-ro watay, mâinwâmpyra mawylymo kulâ ise mâenehonlymo”
warâ lâpylâ iwenibyem awyly — kely Jesus Satanásram.
8 Ilâpyryem myani iwy kaynonro onwa adaholy Satanásram. Idânârâ onro anano modo nhenehonly; idânârâ âdydo imeom iwâkuru modo, tâwâenseim modo warâ nhenehonly. 9 Aituo myani aguely Jesusram:
— Idânârâ awârâ mâentaynly modo âyam xuduze urâ, ienado âzeguhoam midyly yrentoen-ro watay — kely.
10 Jesus aguely:
— Âyrentoem inado âzeguhoam witaymba ise urâ! Deus itaumbyry awo wâgâ iwenibyem:
“Kywymâry Deus enado lelâ âzeguhoam itaungâ.
Aguehobyry ara lelâ aitaungâ”
kely iwenibyem. Idâ, Satanás. Tarâpa ikâ — kely Jesus.
11 Aituo Satanásram âjionly. Satanásram âjiompygueduo myani anju domodo saindyly, Jesus eydâ atoram xuahuze, idânârâ ize ato modo xuduze warâ.
Jesus Galiléia eynynâ tâwanu nhaguhobyry
(Mc 1.14-15; Lc 4.14-15)
12 João Batista kadeia oday kely tindatuo myani Jesus Galiléia yan-yam idâly. 13 Xidadâ Nazaréamba olâ myani odopâdondyly-ro warâ. Xidadâ Cafarnaumdâ myani âxidâdyly, Galiléia iwalu iwaguepa, saguhoem kydamudo Zebulom, Naftali warâ eonronruem xuduypy eynynâ. 14-16 Enanâguewâdaungâ saguhoem Deus itaumbyry egatuimbyry Isaías inweniby:
“Kydamudo Zebulom, Naftali warâ eonronru
Galiléia eynynâ ejiku, paru Jordão kuynâ,
tuomareim kuru ise âmaemo judeu, judeu keba alelâ,
mârâ anaym tâjikuneim modo,
âdaralâ Deus itaumbyry mâuntuba olâ âmaemo.
Awylygue toenzepa âiguelymo mâyntadylymo, mâseguâdâdylymo warâ.
Deus wâgâ âzenomedâoze olâ âmaemo,
iajinu odano aramo lelâ ise, iamu odanopyryem” kewândymy.
17 Deus xunâry egatuze myan-yam Jesus idâduo, Isaías inweniby ara kehoem myani aidyly. Târâlâ myani Jesus unâ nhegatuly adaguly. Alâ myani aguezesedyly:
— Âjityendaungâ inakanhe amitomobyry wâgâ. Inakanhe adâjidyly imowâdaungâ warâ. Arâ lelâ ise Deus âwymârymoem awyly — kezesedyly.
Jesus kanra awâni modo tynynonroem ingâsedobyry
(Mc 1.16-20; Lc 5.1-11)
18 Paru Galiléia emelay tadakobâday myani Jesus azagâ uguondo nhedyly, iwaigoru, iukono warâ; Simão Pedro, André warâ. Âedâgue kanra sawâni myani akaemo, vende tientoem. Âedâ paikaji nhamedaymo myani Jesusram âzeholymo. 19 Azakâlâram myani Jesus aguely:
— Âetaungâ. Saguhoem kanra keankâ mawelymo; iwerâ kurâ domodo ynynonroem itoem unâry egaturin-em ise âmaemo — kely.
20 Inepa kehoem myani âedâ kanra sawâto inmolymo, Jesus eynynonroem tâitomoem, Deus wâgâ tiuntuhomoem.
21 Tâtâday myani Jesus azagâ uguondo modo nhetondyly, Tiago, iukonolâ João warâ. Zebedeu imeombyry myani akaemo. Ekadybymoem myani tywepirymo oday tunwym agâ. Âedâ kanra sawâto myani kua nhekylymo, kopaelâgâroem. Aituo myani Jesus akaemo ingâsedyly tynynonroem itomoem. 22 Inepa kehoem tywepiry odayba idylymo. Tunwym tyânzemo myani, Jesus agâ tâtâhomoem.
Jesus kurâ domodo nhenomedâdobyry, tâwânuneim modo kua nhetobyry warâ
(Lc 6.17-19)
23 Idânârâ Galiléia eynynonro âtâ anakâ myani Jesus sakadyly. Âtâdyguyhomodâ mykâinane Deus wâgâ nhenomedâdylymo. Deus iwymârymoem idyly wâgâ mykâinane unâ iwâkuru nhegatuly. Tâwânuneim modo, âsenagazeni modo warâ kua tyese mykâinane. 24 Tâinkâ lelâba myani anhekyly egary idâly Síria eynynâ. Aituo pylâ myani tâwâneim modo Jesusram nhadylymo-ro warâ. Âdaunlo tâzewânulâ kua nhekyly. Kadopâgue taseim modo kua nhetaynly. Ekomani modo kua nhetaynly. Adakobâdânry modo kua nhetaynly lâpylâ warâ myani. Idânârâ tâwâneim modo tyam idâypy kua tyese lelâ myani. 25 Toenzepa myani kurâ domodo nhapygue awyly, Galiléia eynynâba âetaymby modo, Dez Xidadâ anano modo, Jerusalém donro modo, Judéia eynynonro modo warâ, paru Jordão kuynonro modo lâpylâ warâ.