15
Ta Angelo Muxatele Tamei Mo Tuꞌutuꞌumaxu Muxatele Tamei
1 Eni emaisou mimii ne mukalu xe ieli mulai teitexi no loxotolo la, la emaisou sosovo vile tatila manina mo iouvilemo. Eni emaisiꞌa ta angelo muxatele tamei xe tuꞌutuꞌumaxu kaluxusou muxatele tamei. Xo anu laꞌia masua manina noxou Lataua kaluxusou ane la ukalu. 2 Mo ieli mulai la emaisou mii vile loxo laxalasi toxoxaꞌa loxo luaki ilou navu kalumo. Mo emaisiꞌa aneꞌi ane miuaulixu mii vova ne mo no anu mii e mupuinu iou loxo anu ne xe no anu itiiti sou ualasou ne itutulu no anu luaki ne paꞌumolu. Aneꞌi minoꞌu susapu noxou Lataua anu mulosiꞌa. 3 ✡ Mul 15:1; Lex 139:14; 145:17La aneꞌi milexenu lexe vile noxou Mosesi anu itema sou xaixai noxou Lataua mo lexe noxou Sipsip ꞌOlu. Lexe ne aloxo ꞌo,
“Lataua Tila xaviinu musuku misevile.
Nini nalavusou naꞌoxonu mimii ta tatila xe lailaixe manina.
Nini itema mulapu mo navikala maninasi.
Nini tatanaanu tuala noxiꞌa ta mitema no lia ꞌo ukalusi.
4 ✡ Lex 86:9; Iel 10:6-7Ninisisi nexolu vaꞌaxu no anu ꞌiliꞌilixo masumasua.
La sou ꞌenaꞌei umomomo sou uꞌumene Tila mo uꞌitinu ualasine uasi?
Tuatuala no xalexalee lia ukalusi ne ineꞌe ipita la ilotu noxinesi.
Xo ꞌiliꞌilixo mulapu noxine ne muxali manina.”
5 ✡ Mul 38:21Mo eni emaisiꞌa milexe mukalu xe ieli mulai teitexi no loxotolo la, la emaisou taasou lalotu anu tani alelaxu noxou Lataua sou aꞌalo manina mukisi. 6 Mo ieli mulai la emaisiꞌa ta angelo muxatele ta tamei ne mitokolomo no anu lavalava kea. Lavalavaiꞌa ne maenaxu misevile mo misakiinu utupoko vile miꞌoxonu no anu xoulu la ulamilami miutupokoxu no lutuneꞌi. Aneꞌi miuatu la miuatu ilou tuꞌutuꞌumaxu muxatele tamei ne. 7 Aneꞌi miuatu mukalu la vile noxiꞌa ta mii tamiꞌa e mimauli ne munoꞌu latotope xoulu muxatele tamei la mulosiꞌa. Latotope muxatele tamei ne muꞌanaꞌana no anu laꞌia masua manina noxou Lataua. Anu Lataua e umauli utotomu mo kaluxu uasi. 8 ✡ 1Ta 8:10-11; 2Aꞌa 5:13-14; Ais 6:4Xe ieli mulai la navu umuxu ilou lamanaxu Lataua mo xavi noxou mutaasou taasou lalotu noxou ne la umomomo sou evile uꞌunalai no anu taasou lalotu noxou ne uasi. Mulai muxali no mine ta angelo muxatele tamei minoꞌu latotope sou tuꞌutuꞌumaxu muxatele tamei noxou Lataua mukalu.