1 Eni emasaxa lexe nini nakaitolonu aululu mamu. Napelaꞌu seꞌisisisi loxo mamine. Naꞌoxo aloxo ne ulai noxiꞌa ta maulusine loxo ta vivine. 2 Mo naꞌoxo aloxo ne ulai noxiꞌa ta sema ta aululu loxo ta nenine xe ta vuangasine loxo ta vivine ta sema, ia namaisiꞌa ta vuangasine la naxavutala masua noxiꞌa mamu.

3 Eni emasaxa lexe nini natoxoneꞌi ta sema ta vaalu ane aneꞌisisi ixoxolu, mo evile sou usaxilaꞌa uasi. La nini nasuꞌulineꞌi. 4 Ia lexe sema vaalu vile ane ta ꞌilie mo ta xaixasie a iloꞌa ixoxolu, la nini nasuꞌulineꞌi mo ilavu laixe no anu xaixai ane muuli no anu xaixai tavuꞌalo. Xaixai ane ne aloxo ꞌo. Aneꞌi imaxaꞌu ꞌiliꞌilixo ane Lataua mumasaxau ulai noxiꞌa ta mitema ane iloꞌa ixoxolu no taasiꞌa mo ikolinu xaixai toxoxaꞌa e ta mamiꞌa iloꞌa ta neniꞌa mo ta xaixasiꞌa miꞌoxonu sou misaxilaꞌa no mine aneꞌi ta molomoloxaꞌa. Xo Lataua mumasaxau ꞌilixo ane ne misevile. 5 Sema vaalu ane anesisi ixoxolu ne, ane imolo tane sou ixomaiou Lataua sou usuꞌuline mo ilavusou ilinga noxou Lataua no voxovoxo. 6-7 Navikalaneꞌi ta sema ta vaalu pekiaꞌu lexe aneꞌi iꞌoxonu aloxo ne. Mo sou ta mitema vaꞌaxu imaisiꞌa, la ivikala masua noxiꞌa uasi. Ia sema vaalu vile iꞌoxoꞌoxonu ꞌiliꞌilixo sou voteꞌi, la ane mixiu tumalie noxou Lataua, mo ane loxo misoli mukalu. 8 Xe lexe itema vile ulavusou usaxilaꞌa ta tulanu iloꞌa ta ꞌolu xe semau uasi, la anu musuꞌanu muxamuxaxu tanu noxou Lataua. Anu uꞌoxonu aloxo ne, la anu muxali masua manina noxiꞌa ta mitema ane ilavusou imuxamuxaxu taneꞌi noxou Lataua uasi.

9 Nasosovosiꞌa ta sema ta vaalu ane lexe aneꞌi ixali ta sema sou xaixai noxiꞌa ta mitema noxou Lataua, la nasovosiꞌa e tauu iexaꞌa muuaulixu tauu ie itemaxu tatalu xe miꞌuluxu mulu vilesisi. 10 Mo aneꞌi ualasiꞌa muxali mupalaꞌa lexe aneꞌi ta sema sou iꞌoxoꞌoxonu xaixai lailaixesi. Xaixai loxo isaxilaꞌa ta ꞌiliꞌa laixe mo isaxilaꞌa ta mitema ane meꞌa no tuala vaꞌaxu mo imulaxaꞌa no laaxaꞌa ta mitema, la iꞌoxonu xaixai sou isuꞌulineꞌi ta mitema noxou Lataua loxo iꞌuinu tavaꞌa. Mo isuꞌulineꞌi ta mitema no anu tuꞌutuꞌumaxu noxiꞌa xe aneꞌi ilailixu maulixaꞌa no anu xaixai laixe ukalusi.

11 Ia ta sema ta vaalu ane ta aululu uao ne, nasosovosiꞌa sou lexe ixali ta sema sou xaixai noxiꞌa ta mitema noxou Lataua mamu. Xo xavutalaiꞌa sou taulaꞌi uavuti, la sou aneꞌi ixiunu tumaliꞌa noxou Kalisito sou imasaxa itaulaꞌi la. 12 Aneꞌi mixiunu tumaliꞌau vaikala e mivikala tei lexe imulinu Kalisito. La sou ta mitema ilavu lexe aneꞌi mixiunu tumaliꞌau, la ivikala lexe aneꞌi misusu. 13  ✡ 2Te 3:11Aneꞌi iꞌoxonu aloxo ne, ia aneꞌi ilavusou ixaxai kalumo uasi. Aneꞌi ilavusou ixixaoxao vitanisi mo iꞌuna no tatani sou imunumunuxaꞌa ta menexiꞌa mo ipupuieꞌi. Aneꞌi ipupuieꞌi ta menexiꞌa, la aneꞌi ilemolu vaikala seꞌi laixe no anu lolomu noxiꞌa uasi. 14  ✡ 1Ko 7:9La sou eni emasaxa lexe ta sema ta vaalu ane ta aululu uao ne, itaulaꞌi. Mo ipalaaneꞌi ta ꞌiliꞌa mo isaxilaꞌu taasiꞌa. Aneꞌi iꞌoxonu xaixai aloxo ne, la evile umomomo sou uvikala masua ulai noxiꞌa uasi. 15 Xo eni elavu lexe seꞌi noxiꞌa ne, mixiu mo mimulinu Satani.

16 Lexe sema vile imuxamuxaxu tane noxou Iesu, ia no tani noxie ne, sema vile vaalu iloꞌa ixoxolu, la laixe lexe ane isaxilaꞌe. Mo sou ta mitema noxou Lataua itavule tuꞌumaxu uasi. Xo aneꞌi sou isaxilaꞌa ta sema ta vaalu ane aneꞌisisi ixoxolu mo evile usaxilaꞌa uasi.

17 Ta tatila e isaxilaꞌu xaixai noxiꞌa ta mitema noxou Lataua laixe ne, laixe lexe ta mitema ilotoneꞌi laixe. Xe laixe manina lexe ilotoneꞌi aneꞌi ane iaꞌalo xe ilosieꞌi ta mitema no anu vaikala noxou Lataua tei. 18  ✡ Lap 25:4; Mat 10:10; 1Ko 9:9Xo vaikala noxou Lataua muvikala aloxo ꞌo, “Ta bulumakau ixaxai sou imalamalaxoꞌu uiti ngiaxu sou sosou uxexee, la umomomo sou isamali anaxaꞌa uasi, mo sou aneꞌi isolixaꞌa la iꞌani uiti temanu seꞌi.” Xe anu aloxo ꞌo, “Ta mitema sou xaixai noxiꞌa ta mitema noxou Lataua ixaxai, la ta mitema noxou Lataua ilotoneꞌi kalumo.” 19  ✡ 2Ko 13:1Mamu sou nalomusou susu noxou tila vile noxiꞌa ta mitema noxou Lataua. Ia lexe ta mitema tamei, uasi la tatalu imaisou mo ilavusou susu ane ne, la sou nini nalomusou. 20  ✡ Ep 5:11Aneꞌi ane ilavusou iꞌoxonu susu, la natulusiꞌa uuli no ieꞌi ta mitema. Mo nakaitoloneꞌi, mo sou ta menexiꞌa imaisiꞌa, la imamaꞌu.

21 No iou Lataua mo Kalisito Iesu xe ta angelo musosovosiꞌa, la eni avikalaneni pekiaꞌu lexe nini namulinu vaikala e eni elosine ne. Mamu sou namasaxaiꞌa ta mitema seꞌisi, ia namasaxaiꞌa ta mitema tavuꞌalo ukalusi.

22-23 Naiexu lexasi mamu. Naiexu uaini sevile sou usuꞌulinu oponeni xe uxexeenu pipiena e ulavusou uxali noxine utotomu. Lexe nini namulaxu avone noxou itema kisou sou nasovosou lexe uxali itema vile sou xaixai noxiꞌa ta mitema noxou Lataua, la naxavutala mo namalei laixe. La sou namulaxu avone vaxa no kisou. Mo namulinu ꞌiliꞌilixo masua noxiꞌa ta mitema uasi. Nini naxolu vaꞌaxu no anu.

24 Xo ta mitema seꞌi miꞌoxonu ꞌiliꞌilixo masumasua mo itulu no anu vaivaikala uao, ia ꞌiliꞌilixo masumasua noxiꞌa muxali mupalaꞌa lamana. Ia ꞌiliꞌilixo masumasua noxiꞌa ta mitema seꞌi ne, utalume xe iliꞌi la sou anu uxali upalaꞌa lamana. 25 Anu aloxo ne, xaixai laixe noxiꞌa ta mitema seꞌi muxali mupalaꞌa lamana, ia xaixai laixe ane mutalume, iliꞌi la sou uxali upalaꞌa lamana.