EXUTU
Izyraeu tõ Esyryhmatopõpyry Ejitu poe
Éxodo
Ekarotopo
Sero Exutu kary tũtatopõpyry. Ynara ekarõko: 1) Izyraeu tõ ytotopõpyry Ejitu poe, namotome toto ehtopõpyry poe; 2) Aytotopõpyry poko ypy Xinai pona; 3) Ritonõpo a tõmiry etapotopõpyry Izyraeu tomo a ypy Xinai po tõmipona toto ehtohme; 4) Tapyi Kurã ritopõpyry Izyraeu tomo a Ritonõpo eahmatohme, Ritonõpo omiry poko oturuketõ erohtohme, eahmary poko roropa zae rokẽ toto ehtohme.
Sero ekarõko roropa Ritonõpo nyrihpyry poko Izyraeu tomo a, orẽpyra toto ehtohme. Moeze poko ekarõko roropa, Ritonõpo nymenekahpyry typoetory aroneme. Tykohmase Moeze ahtao tosetyme ynara tykase Ritonõpo eya: Ywy Ase. Jesetyme Ywy Ase. 10me inyripohpyry tokarose eya roropa Aomipona toto ehtohme (Exutu 20).
Sero pape ao
Izyraeu tõ pynanohtopõpyry Ejitu tõ namotome ehxĩpo 1.1—15.21
Tuna Tahpiremã poe ypy Xinai pona 15.22—18.27
Ritonõpo Nyripohpyry, Inetapohpyry, enara 19.1—24.18
Ritonõpo Tapyĩ Kurano, inamorepatoh eahmary poko 25.1—40.38
1
Izyraeu tõ etuarimatopõpyry Ejitu po
1 Mame Jako mũkuru tõ toytose tumykõ maro Ejitu pona tytapyĩ taõkõ maro. Ynara toh kynexine: 2 Rupẽ te, Ximeão te, Rewi te, Juta te, 3 Isakaa te, Zepurõ te, Pẽjamĩ te, 4 Tã te, Napatari te, Kate te, Asea, enara. 5 Jako poenõ maro ipakomotyã maro atapona 70me kynexine. Imũkuru Joze toytose apitoryme Ejitu pona.
6 Morarame okynahtao toorihse Joze, irui tõ roropa emero, zakorõ roropa. Imehnõ roropa toorihse emero mokaro zumakahpõkomo. 7 Yrome Jako mũkuru tõ, ipakomotyã roropa Izyraeu tõ toemũkuase tuhke. Tomãse toto. Jamihme toehse roropa toto. Tãtahpahse toto Ejitu nonory punero.
8 Moromeĩpo imepỹ tuisame toehse Ejitu esẽme. Joze ehtopõpyry poko tuaro pyra kynexine ynororo ipunaka. 9 Ynara tykase ynororo typoetory tomo a:
— Enetoko ke! Mokaro Izyraeu tomo jamihme mã toto. Kymarokõ motye emãnõko roropa mã toto. 10 Imepỹ nonory põkõ maro kuosetaparykohtao otarame kuepetõkara maro osepeme exĩko mã toto. Toto akorehmãko kyporemãkaporykõ poko. Mame kurumekatorỹko otarame mã toto. Naeroro tuaro sehtone toto poko. Emãpyra syripotone toto.
11 Morara exiryke Izyraeu tõ rohmanohponanõ tyrise Ejitu põkomo a tõmipona xine Izyraeu tõ ritohme te, yronymyryme toto rohmanohpotohme, erohtoh tupimã ke. Morarame pata tõ tyrise eya xine: Pitom te, Ramese roropa, tonahsã kurãkatohme Ejitu tuisary a. 12 Yrome itamurumehxo tyrohmanohpose toto ahtao Ejitu põkomo a itamurumehxo Izyraeu tõ tomãse. Toto zuno toehse Ejitu põkomo, 13 naeroro topehke pyra typoetoryme toto tyripose eya xine. Orẽpyrahxo tyrohmanohpose toto eya xine. 14 Toetuarimase toto toerokurukõ poko; omoxinety puimary poko te, tijoro tõ riry poko, tapyi tõ riry poko te, tupito tõ arykary poko, enara. Emero poko toerohse toto ahtao ro, toto zehno sã esẽkõ kynexine, popyrahme sã toto tyrise eya xine.
15 Mame ynara tykase tuisa Xipara a, Pua maro Izyraeu nohpory tõ onurumapotõkomo a:
16 — Izyraeu nohpory akorehmaryhtao oya xine enururu poko ynara tyritoko: tonuruse orutuame ahtao etapako; yrome nohpome ahtao onetapara ehtoko. Ah isene nexino.
17 Yrome Ritonõpo tonetupuhse eya xine. Naeroro tuisa omipona pyra toh kynexine. Orutua kõ tonuruse ahtao typynanohse toto eya xine. 18 Naeroro tuisa a onurumapotõkõ tykohmapose tyya ekaropotohme eya xine. Ynara tykase ynororo:
— Oty katoh morara myritou? Oty katoh enurusenã orutua kõ pynanohnõko matou?
19 Ynara tykase toto:
— Mokaro Izyraeu tõ nohpo tõ Ejitu tõ nohpory sã pyra mã toto. Tupime pyra enurũko mã toto. Eporehkara ro yna ahtao, poeto tõ enurũko mã toto.
20-21 Ritonõpo omipona se onurumapotõkõ exiryke, kure tyrise toto Ritonõpo a. Oximaro tyrise Ritonõpo a jekyry tõ maro; tynioke, typoenõke, enara.
Mame Izyraeu tõ tomãse itamurume. Jamihme toehse roropa toto. 22 Mame ynara tykase tuisa, typoetory tomo a emero:
— Izyraeu mũkuru tõ enurusenã kõ ematoko tuna Niro kuaka. Nohpo tõ ipynanohtoko isene toto ehtohme.