‘Apousel’
‘Apousel’ sohwafe Syohofoho.
Olo Hungkuno Sɨmoꞌmjofoho.
Jisas ahwomomneꞌno nto sɨmentiso sohonta soswo teti-tɨli (33) nto uyakoloꞌmentisopolɨkeno Luk olo iyoswo loso mtɨꞌmokumentisofoho. Luk sohwo iyoswo Tiyoufilosɨmneꞌno mtɨꞌmokonto tɨfi olo iyoswo Apousel loso mtɨꞌmokementisofoho. Olo iyoswo hiloso Jisasɨmo aꞌamu songo inɨngkamentohofo soꞌnji Poulɨꞌnji Mponopasɨꞌnjiye syohoꞌnji Pitaꞌnji Poulɨꞌnji nomꞌne aꞌamu soꞌnjimo Anɨtuye Towahuno nɨhuꞌno yokumpohnꞌnyo uhulaꞌmoꞌmentiso sontnneꞌno Luk mtɨꞌmokumentisofoho. Osoꞌno olo iyoswo homo lomne yofeso piꞌnɨngo womulantɨfi inyofoho. Yofe hiso ole: Aꞌamu syohoꞌnjo hwafe iyoswofoho. U, aꞌamu syohoꞌnjo sohwamo Anɨtuye Towahuno uhulaꞌofo iyoswofoho. U, Pitaꞌnji Poulɨꞌnjiye syoho iyo somjo hungkuno iyoswofoho. Osoꞌno olo iyoswo homo lomjo yofe neso ole: Aꞌamu syohoꞌnjo hwafe iyoswofoho. Osoꞌno yofe tɨfo mulinyoso ole: Apouselɨyoho. Luk iyoswo sɨmoꞌmjo mtɨꞌmokumentisoso Jisas yoꞌmayo hopiꞌnonohino imentiso soꞌno mtɨꞌmokumentisofoho. I osoꞌno olo iyoswo loso aꞌamu Jisasɨmo inɨngkunyoso Anɨtuye hungkuno likuꞌmeefo yahonɨngkofi aꞌamu Jisasɨmo minɨngkunyoso tango uyontɨfi fonjasiyo ulohoꞌmotofo soꞌne mtɨꞌmokinyofoho. Osoꞌno olo iyoswo Apousel lomjo hungkuno hwapɨngo Anɨtuye hungkuno likuꞌmeefo syohoso Jelusalem mtaꞌni fokaꞌmentisoso nɨhuꞌnahone Jutiya pɨwekihnꞌnawo lohofonto osopontaꞌangoso Someliya pɨwekihnꞌnawoꞌmentisofoho. Osopo ntaꞌni mjimoꞌnɨmoponto nakwoe ango lopo ifawoꞌnyofoho. (Olo hungkuno lomjo hungkuno hwapɨngoso Apousel sohe engo 1 honɨngkano weꞌe 8. Osopo weho.) Olo iyoswo loso Luk ango Loum humanto mtɨꞌmokumentisofoho. Olo iyoswo hiloso hofɨko nakwo itoꞌno ehumayoꞌne hungkuno iwoloꞌmokumentohofo kalohi nakwo atofo lɨhwasi tɨfi unɨngkohwano.
1
Jisas ulɨmento, Nje Towahuno Wopɨngoso sekuyepono wolɨhwatɨmonnoho.
1 Nje Tiyoufilos sohwosi, ngko Lukɨꞌni mtɨꞌmokalokweno. Iyoswo sɨmoꞌmjo kikimneꞌno mtɨꞌmokumentoheso ole, Jisas kakoe hungkuno lutɨhwanto kakoe syohoso nomjɨmɨwento ahwomomo sɨmentisofoho. Osoꞌno ifalifaliyo nto mtɨꞌmokumentohefoho. Hungkuno songoso olenoho. 2 Jisas Kako ahwomomo masiyo sohonta kako Anɨtuye Towahunoꞌnji nohumanto kakoe aꞌamu apousel uhwosopoꞌmentiso sohwamo oso hungkunoso yoꞌmayo syoho ifitnneꞌento ulɨmentisofoho. 3 Jisas poyo peꞌnonto apaꞌno songo lɨkaꞌmentiso sohonta kako yoꞌmayo wonyoangkafo yontanɨngkofi sɨkuno fouti (40) memjaoꞌmentisofoho. Aꞌamu huhwo sohwa ose nuhwonontɨfi ole syafɨhuꞌmentohofi, Ou, Jisas songo humayoso nehopeho. Huno ose uyɨmentisofoho. Jisas nohumanto Anɨtu nakumo yokumpohnꞌnyo enemokosyohumane soꞌno lutɨhwamentisofoho.
4 Sɨkuno fihwi Jisasɨye inomokomoyo sohwa Jisasɨꞌnji nuhuꞌmokontɨfi Jisas ole ulɨmento, Nonje nonje humpekutoho. Jelusalemnohini fosyohumantokuno. Oso hiso Anɨtu kako sejapone soꞌno nto selɨmentohe soꞌno fohontohumantokuno. 5 Joun aꞌamumo mijo kiyomaꞌmojo sohwo mijoꞌnohino kiyomaꞌmojofoho. Sɨkuno mofonepo Anɨtuye Towahuno wosehulaꞌoꞌmontonoho. Ose ulɨmentisofoho.
6 Apousel sohwa Jisasɨꞌnji uhuꞌmokumentohofo soꞌno Jisasɨmo ulohonɨmentohofi, Hwe Engo sohwosi, olohonta nakwo aꞌamu Jutajo hnꞌnwi nakwo mokosyohumunaneꞌno wonamokumonntaho. Nakwoe yofe Isɨlael engo umoꞌnɨmontolaho.
7 Ose ulahonɨngkofi Jisas ulɨmento, Oso sɨkuno hiso sekwo huno maseyohoyohoho. Oꞌo, Mpohwo Anɨtu oso sɨkuno hiso hoꞌnahumentisofoho. Kakoꞌnohini mokosyohumaho. 8 I osoꞌno Anɨtu kakoe Towahuno Wopɨngo sekumo sehulaꞌofoso sohonta kakoe yokumpohnꞌnyo nomafɨkuji nje hungkuno sekwo nomotakuji aꞌamu hopiꞌnonohino somo filutɨhwafɨkuno. Pone Jelusalemneꞌno, hwaho Jutiya hopiꞌnonohino neꞌno, hwaho Someliya neꞌno ango yawojoꞌmeemo filutɨhwafɨkuno.
Jisas ahwomomo sɨmentisofoho.
(Mak 16:19-20; Luk 24:50-53)
9 Oso hungkuno hiso Jisas ulahonɨngki aꞌamu sohwa uhwontohumentanɨngkofi kako ahwomomo sɨmentisofoho. Nosontanɨngki himo aꞌamufe tɨmomo uhoholoꞌmentisofoho. 10 Hofɨko ahwomomo tɨmo huno honamofontɨfi hwe manjiꞌmofo halojoꞌnjo hufaꞌu sohwaꞌu hofɨkoꞌnji lohofonji ulɨmentisi. 11 Sekwo aꞌamu Ngkalilintaꞌango soku, nolohofontɨfi ahwomomo pehoꞌno uhwontohumalofo. Anɨtu nto utɨmakwoho. Oso hwe huhwo sohwo sekwo olohonta uhwonɨngkohofo paꞌnyoso hwangku asomo noponefoho. Ose ulɨmentisiyefoho.
Hofɨko Jutasɨye syohomneꞌno hwe fihumo uhwosopoꞌmentohofofoho.
12 Oso hwofɨkiꞌnyo Oulif sopo ntaꞌni nokotapontɨfi Jelusalemno umentohofofoho. Ikanopoꞌmaho. Oꞌo, tɨfoneponoho. Aꞌamu Jutaso sɨkuno iyoho humayo osomno hofɨko hano tɨfonepo emmotofoso paꞌnyoponoho. 13 Jelusalem iꞌmofapontɨfi ango tokilonjwaꞌmo molinyo somo humamentohofo sopo kotasɨmentohofofoho. Oso aꞌamu huhwo sohwafe yofe ole, Pitaja, Jounja, Jemɨsɨja, Entɨluja, Filipɨja, Toumasɨja, Mpatoulomɨyuja, Matɨyuja, Alɨfiyosɨye hwomu Jemɨsɨja, Saimoun Seloutɨja, Jemɨsɨye hwomu Jutas sohwanjoho. 14 Hofɨko sɨmeho afaꞌnohino inontɨfi Anɨtuneꞌno jomo ulɨwoꞌnɨmentohofofoho. Moyaꞌmi sofa Maliya Jisasɨye konaꞌwohiꞌnji konɨngkwaꞌwehwosanji hofɨkoꞌnji Anɨtuneꞌno jomo ulɨwoꞌnɨmentohofofoho.
15 Hofɨko Anɨtumo jomo ulontanɨngkofi sɨkuno fiso memjaoꞌmentisofoho. Sɨkuno fihumo aꞌamu wan hantɨlet tɨwenti (120) Jisasɨmo inɨngkamotofoso nohumentanɨngkofi Pita nolɨkafonto ulɨmento, 16 Nje aꞌamu soku, hohonta Anɨtuye Towahuno sohwo kakoe mampaho Ntefitɨye sɨmehomoꞌmo hoꞌnosyahonɨngki Ntefit oso hungkunoso mtɨꞌmokumentisofoho. Oso hungkuno hiso ne imoꞌnyoꞌnefoho. Jutas kako Jisasɨmneꞌno tokoyoꞌofo imentisofoho. Osoꞌno Ntefit mtɨꞌmokumentisofoho. Olohonta oso hungkunoso ne imoꞌnɨmasofoho. 17 Jutas nakwoꞌnji humamojo hweho. Nakwoe syohoso afaꞌenohinoso Jisas nahwosopoꞌmentisofoho.
18 Jutas huhwo sohwo kakoe wonyo soꞌne hamniyoho nomanto hwaho mpe yonto osopo mnokino kiꞌmo lohofonto pɨwahuꞌmentisofoho. Nopɨwasyonto kakoe sɨmeho fongkulo lohofonto yoꞌmayoso huꞌmewahuꞌmentisofoho. 19 Oso hungkuno hiso hoꞌnɨngkahonɨngki aꞌamu Jelusalem mtaꞌangoso nupaꞌnontɨfi oso hwaho hopo sopono mulɨmentohofi, Akelɨtamanoho. Hopo sopone yofe yɨwoloꞌmo ole, Hwaho jahinoꞌnjoponoho.
20 Hohonta Ntefit olo hungkuno loso Taꞌnjo Iyoswomo mtɨꞌmokumentisofoho. Hungkuno ole,
Kakoe angoso siki wawentɨhwono.
Aꞌamu fihwo nohumayoꞌeno.
Nomꞌne hungkuno taꞌnjoso ole mtɨꞌmokumentisofo,
Hwe nomꞌnehwo kakoe syoho womano.
21-22 Oseso Jutasɨye syoho mayosoꞌno nomꞌne hwe fihumo uhwosopehwasi kako nakwoꞌnji Jisas songo lɨkaꞌmentiso soꞌno wolutɨhwantanoho. Olo hwe huhwo lohwo kako nakwoꞌnji Jisasɨꞌnji nohumentanɨngki Joun aꞌamumo mijo kiyomaꞌmentiso sohonta Jisas kakoe syoho emaꞌmentisoso oso syoho mjɨmɨwento osohonta Anɨtu Jisasɨmo utɨmaꞌmasofoho. Oso hopiꞌnono uhwonɨwoꞌnɨngkiso sohumo nakwo uhwosopeeno.
23 Pita ose ulahonɨngki aꞌamuso hwe hufaꞌu hwaꞌu uhwosopoꞌmentohofofoho. Hwe angaꞌno kakoe yofe Jousep Mpasopas, nomꞌne yofe mulɨmotofoso Josɨtosɨyoho. Hwe nomꞌne sohwo kakoe yofe Matiyas. 24 Oso hwaꞌumo uhwosopentɨfi Anɨtumo jomo ulɨmentohofi, Hwe Engo, aꞌamu hopiꞌnonohinofe sɨmehomo huno kiyohoho. Olo hwe uhwonalokune lohwaꞌu ntisohumo uhwosopeenehwono. 25 Oso hwe huhwo sohwo Jutasɨye apousel syoho womano. Syoho hiso Jutasɨmo kɨko uyahonɨngkini Jutas syoho wopɨngoso ulɨkoꞌmanto nɨhuꞌnahone tɨkanomo umentisofoho. 26 Anɨtumo ose ulontɨfi hofɨko sojo weꞌe soꞌnji syohiꞌnyo yontɨfi Matiyasɨmo uhwosopoꞌmentohofofoho. Hwe huhwo sohwo kako Jisasɨye apousel aho hopiꞌnono sɨfe mtaꞌni angaꞌnohino sohwanji humamotofofoho.