8
Uisneno npaek Kristus he nahakeꞌ rais manbaꞌan feꞌu, reꞌ maꞌtaniꞌ nneis naꞌko rais manbaꞌan amnaaꞌ
1 Onaim au uꞌuab rais maꞌtaniꞌ es on nai: oras ia, hit tmuꞌi trair aꞌnaak rais pirsait reꞌ naꞌraat ma maꞌtaniꞌ nneis naꞌko ahuunt ein. In reꞌ naan, es reꞌ Naiꞌ Yesus. In ntuun On ma naprenat et sonaf neno tunan anbi bare reꞌ mahormaat reꞌuf et Uisneno Aꞌraat Reꞌuf In abnapan aꞌneꞌu.✡ Siit Pures-Boꞌis sin 110:1 2 In nanaob In mepu et Uisneno In baer onen batuur. Bare naan, Uisneno neikn On es reꞌ anmoꞌe, mansian ii ka bisa nmoeꞌ je fa.
3 Aꞌnaak rais pirsait sin aꞌnaak koꞌu, biasa neik fuaꞌ-turuꞌ he nafuat sin neu Uisneno. Es naan ate, Naiꞌ Yesus ro he neik fuaꞌ-turuꞌ msaꞌ. 4 Mes Naiꞌ Yesus ka nanaob fa In mepu nbi pah-pinan, natuin anbi pah-pinan ia anmuiꞌ aꞌnaak rais pirsait reꞌ anfee fuaꞌ-turuꞌ neu Uisneno, natuin kaꞌo Musa in atoran. 5 Sin nanaob sin mepu nbi Tenar Onen, on reꞌ baer onen batuur et sonaf neno tunan. Fin oras kaꞌo Musa nroim he nahakeꞌ Tenar naan, Uisneno namnaub ee mnak, “Mumnau murek-rekoꞌ! Ho ro he mmoeꞌ Tenar naan batuur-batuur mutuin gambar reꞌ Au ukriraꞌ ꞌrair je ꞌeu ko, anbi ꞌtoeꞌf ee tunan!”✡ Anpoin naꞌkon Pah Masir 25:40 6 Mes Naiꞌ Yesus In mepu, maꞌtaniꞌ nnes-neis naꞌko aꞌnaak rais pirsait amnaaꞌ ein. Oras ia, Uisneno nahakeꞌ rais manbaꞌan reꞌ reko nneis, natuin In npaek Naiꞌ Yesus anjair nete-ranan he mansian ii bisa nmonin nbin rais rameꞌ nok Uisneno.
7 Un-unuꞌ feꞌ, In nahakeꞌ rais manbaꞌan nok kaꞌo Musa oras In nasanut atoorn ein naan. Maski on naan amsaꞌ, mansian ii ka bisa nmoni kninuꞌ fa natuin atoran naan. Nok ranan naan, sin ka bisa nmonin reko fa nok Uisneno. Es naan ate oras ia, perluu he nmuiꞌ rais manbaꞌan reꞌ reko nneisi ntein. 8 Fin unuꞌ feꞌe te, Uisneno nakain Iin na, natuin sin ntanhai nafan-fain In atoran amnaaꞌ. Oras In ka naran ma ntahan fa ntein ate, In natooꞌ, rarit naꞌuab am nak,
“Amneen mirek-rekoꞌ, Au reꞌ ia Usiꞌ!
Ro tebes! Au ro he uhakeꞌ rais manbaꞌan feꞌu,
ꞌok pah Israꞌel,
ꞌok uuf naiꞌ Yahuda.
9 Rais manbaꞌan reꞌ Au he uhaek ee ꞌok sin naan,
ka humaꞌ meseꞌ fa nok rais manbaꞌan reꞌ unuꞌ feꞌe te Au uhaek ee,
ꞌok sin beꞌi-naꞌi sin.
Unuꞌ feꞌ, Au ꞌnaaꞌ sin aꞌniimk ein,
he upoitan sin naꞌkon pah Masir.
Mes sin ka nmoeꞌ natuin ein fa
saaꞌ-saaꞌ reꞌ sin manbaaꞌn ein nok Kau naan.
Es naan ate, Au ka ꞌroim he ꞌtoe ꞌok sin fa ꞌtein.
10 Rais manbaꞌan reꞌ au he uhaek ee ꞌok pah Israꞌel,
in afan naan ii, on nai:
Au of utunuꞌ ma ꞌtao Au atoran naan aꞌbi sin teenb ein naank ein.
Au of aꞌtui Au preent ein aꞌbi sin nekak naank ein.
Rarit Au ꞌjair sin Uisneno,
ma sin njarin Au ngguin.
11 Sin of ka nperluu fa he nanoniꞌ ntein sin partei ngguin,
ma sin aok-bian sin im nak,
‘Hi ro he mihiin ma mikeo Uisneno!’
fin sin arsin nahiin ma nakeo Kau nok reko,
anmurai naꞌko aan-aan muniꞌ tar antea koꞌu ma unu.
12 Natuin Au ꞌroim he ukiriraꞌ Au rais kasian ꞌeu sin,
es naan ate, Au ꞌnikan ma ꞌniahan ꞌain sin saant ein ok-okeꞌ.”✡ Naiꞌ Yeremias 31:31-34
13 Oras Uisneno naꞌuab nak, In he nahakeꞌ rais manbaꞌan feꞌu nok sin, in oetn ii nak, rais manbaꞌan amnaaꞌ naan, ka mapakeꞌ fa goen. Ka ꞌroo fa te, in namneuk goen.