1-2 Sarah aherrety 127 anenh, apmer Kiriath Arba ilwemel-antey ikwer-itwek-antey. Apmer itna ingweran Hebron, Canaan-itwek.

3 Abraham rarl amperrngirrek ikwer. Ikwer-penh Abraham Hitt-kenh-rnem-warl alhek, ra renh-rnem ayerney-alhek, 4 “Ayengan alethang. Nthenhek atha anew atyenh arrewaly akwernem? Apmer mwerr ngay ntwa akely atyenh anthem?”

5-6 Rernem angkek, “Ngarl Atyetyart ilkwan intey nthenhek ngarl arlkwententyelan? Kel, ntwa intey yanhek anew ngkwenh arrewaly akwerna.” 7-9 Abraham angkek, “Ephron ayernerr-arey intey renh parrik impalth-itwek tharlemiletyek. Atha man ilkwan anthem, arrantherr ayenh ingkerrel aytaretyek, atharl anthem.” 10 Ephron apmerek-artwey, artwa Hitt-kenh apmer tern ilkwa arriw-itwek-antey anenh. Abraham-el apmer ikwer ayernek. 11 Ephron angkek, “Kel, intey atha anthey, ingwerel-rneman ngenh aytaremel ntwarl atyeng-they intey ineman.”

12-13 Abraham angkek, “Man ilkwa innga atha ngenh anthem, arraty-angkwarr.”

14-15 Ephron ra ilek, “Menty! Thilp 400 ntwa payemeley-areny inteyekey! Arwa ngkweng aknga, man-weny. Atha ngenh menty anthek, man-weny-anem.”

16-18 Abraham-el artwa Hitt-kenh 400 thilp anthek, artwa akngerrel aytarek-angkwarr. Alakenh Abraham-el apmer Ephron-kenh payemelek ikwerant-anem, ikwerenh-rnem-akert, intey-akert, arrewaly renh akwernetyek. Apmer ranap arwerl-angketyarr. 19-20 Abraham-el anew ikwerenh intey ikwer-itwek akwernek, rarl payemelek-itwek, Hitt-kenh-rnem-itwek.