1 Ingwerentyel arrantherr akngerrarl atnyenem. Irrpetyapewant ayeng angkeyel aleyan. Ampwal akngerrel arrenhantherrenh ilperteley-angker. Arrantherrap artnemer artewentyel, ingwer-ingweran apmwanemarl aynteyenh-wetyarl. 2-3 Rap alakenh aynteyel, ilek-ilek mwerr-angker arrewantherrenh kwaty-apenyarlap ran. Ilkwetangkwel, rap artwerretyerrem-anem. Amern arrewantherrenh intenty-apeny. Arnkwa mwerr-angker arrewantherrenh interrkel arlkwenty-apeny, altywer-altywerelem. Apwert arrewantherrenh apmwerrenty-apeny. Ya, ilek-ilek mwerr-angker arrewantherrenh apmwerreyenh. Ilek-ilek akngerr mwerr-angker atnyenem arrantherr ankety irremel, ament atnyenem. 4 Arrantherrap akngerr arrernem, warrkerreyew katen-itwew, ilemel payemeleyew renh-rnem arraty-angkwarr. Innganap arrangkwarl! Arrantherrap akelyant payemelem, warrk ipmelhentyelan. Rernemap artnem arrewantherr. Akngeyelanap renh-rnem awemarl artnentyan. 5 Arrantherrap ilek-ilek mwerr-angker akarrelem, ahern nhenh-itwew inkwerelhemel anemel. Yew-yew, artewenty innga Akngeyan arrewantherr ahelerrem. 6 Mwerr-rnem-alew, arrantherrarl ayntarrp-ilemel atwem arwa? Rernem arraty anem, arrantherrap ikwer-rnem-wety arlkarerremarl. Rernem ahelerrey-angenh arrewantherr, arrantherrap renh-rnem ipmew atwem.

7 Atyenh-rnem, arternp akeleyt mpwelhaynteyew, Jesus-arl apey-alpeyenhew. Artewenty iterrey-angenh. Artwa amern atherrk lyapelheley-angkerew iterrenh-arey. Ra ahern-tangkwel angernem, ntang-anem rlker-anthem. Rap arternp mpwelhem kwatyew rntwentyew. Rap arternp mpwelhem amern atherrk lyapentyew ahern-itwew. 8 Kel alakenhap arrantherran Jesus-ewan arternp mpwelhemer, rlterrk anemel, inngarl ra apey-alpeyenh-wety. 9 Nthakenh arrantherr ilterrey-angenh, tyel-angkerrey-angenh, Akngeyel arrenhantherrenh court-emelewerr. Yew-yew, ingwer-ingweran Jesus-arl apetyeyenh-wety, ayern-aynteyew ingkerrenh.

10-11 Atyenh-rnem, angkakert-rnemew iterrenh-arey. Awank-akerr rernem angka Akngey-wenh ilerl-apenh. Ingwer-rnemel renh-rnem irrwernenh, pwarrk anthenh. Rernemap ipmelhey-angenh, arrangkw. Arternp rlterrk mpwelhenh Akngeyew intem. Rap inkwerelhenh ikwer-rnem, mwerr antwemel. Arrantherr renh-rnem iwarrernemer. Artwamp Job wethew iterrenh-arey. Rlterrkarl ikwer ayntenh, Akngeyewant ra intem iterrenh. Rlterrkarl ayntew-penh, Akngeyan ikwer athamerrenh. Aleyan rlengk Akngey athamerrem ikwerenh-rnemew irrkaty-angkwarr.

12 Atyenh-rnem, angka rlterrk ingwer nhenhew iterrenh-arey. Arraty angkayntenh-arey intem. Nthakenh angkey-angenh irrtywerremel. Nthakenh ingwer-rnem terikemeley-angenh. Arwa arraty-angkwarrant angkayntenh-arey! Alakenh arrantherr tyernemer arraty-antey. Arrantherr apek arraty angkey-angenh, Akngeyelanap apmwa antweyenh arlta anyent ikwerel, rarl court-emeleyenheng-arey akngerr.

13 Rlterrk anyentew apekan aynteyel, ra apek arlka apmwarl aneyel. Ra Akngey ayernemer alpemeleyew. Ingweran irrngerney apek aneyel. Ra Akngeyew inkwerelhemel aylelhemer. 14 Ingweran arntety apek aynteyel. Ra atyetyart tyaty-areny-rnem ilemer, apetyeyew ikwer-warl. Rerneman Akngey ikwer ayernemer, itepel renh arnep-arnemel, anter alipel renh apernemel. Alakenh-anyem Akngey ikwer ayernemer mwerreleyew, itna Jesus itnewemel. 15 Arrantherrarl alakenh ayernem, iterremel Akngeyew, arntety rap mwerrerremarl. Ra apek arntetyerrew, apmwel-ayeth-tangkwel ra anenharl. Akngeyelap apmwa ikwer-wety irrarlkem, awakelhey-angenh ikwer.

16 Alakenh-wety Christian anyentan ilelhemer Christian ingwer-rnemewan, rarl apmwelhelew, sorry-anem angkemel. Rap ilemer, Akngey ikwer ayerneyew. Ra apek arntetyerrew, apmwel-ayetharl anenh, Akngeyelan renh mwerrelemarl.

Alakenharl aynteyel: ingwerenty Akngeyew arraty aneyel, rap Akngeyan alhewerarl ayernem. Rap renh awemarl, mwerr mpwaremel ikwer. 17 Artwamp Elijah wethew iterrenh-arey. Artwamp ra angkakert Akngey-wenh anenh awank-akerr. Artwa anantherr-apenyarlap ran. Rap Akngey angka rlterrk-angkwarr ayernew alakenh, “Apmer nhenh arlenyela!” Inngarlap aherrety irrpetyew-atety ayntew artwerrety. Kwaty rntwey-angenh, arrangkw. 18 Ikwer-penhan ra ayernew, kwaty thweneyew-anem. Inngarlap kwatyan rntwew apmer ikwer-itwew. Amern atherrkeny-akerr-anem angkep lyapew ikwer-itwew.

19 Atyenh-rnem, anyent apek angkeperrem Akngey-wety, apmwel-ayeth-anem anemel. Christian ingwerelan renh alpemelemer. Arternp-antey ikwer angkemer, raw Akngey-warl angkeperrenhey-alpeyew. 20 Alakenhan mwerrarl. Akngeyel apmwa ikwer-wety irrarlkem-anem awakelhey-angenhel, iylpelerremel-anem apmwa ingkerrew.

Kel-antey.