1 Bar yinouroko duka marnyafo hanykfot. Nikmoh womr htita-wokomr wom fasoh neft yifir, niko womko, Bro Nkifrarhu Yafothatn nikmoh wiyauyau nmbuham yak hta bohtiwako, nikomn yihato hifa yima yuhur nd yimar kfo hta bohta marnya-kfot. To niko, nd yimar mrokfom kfo ptharahnomr, niko tuko duka marnyafo hanyhato womr kfo pthakfot. Satanr nikomn tfit rim suhnihato hatone nhehruhatrko suhrahko. 2 Tuko nahti duka nahti dukakfot. Nikmoh womm tamoh tamoh krhopam kekwom, niko womko yihato titanhokfot. Tot tu Kraisr hiket yimaroh neft. 3 Ni womn mirahn akfo amiya, “Na nd yimar kanjo krhopam yekwoyann na yi htiruhanr?” Ndhtet tngt ka be kfo fura twanhiwun. 4 Yima afo tunhu rhu wiyauyau nmbuham hti tungunahato ee kfo pthakfot. Tu hifa hifa korht ninhu rhu wiyauyau nmbuhat ee btn kfo yindhorneft hifa. To mirahn ninhu rhu wiyauyau nmbuhat hifa htihato tfit womr faso akfoyanr. 5 Ni womn tunhu wiyauyau nmbuhat hti yukatohaf hanykfot. Mirahn womrhu nefm htihato apthaya. Womr, ror turhu duka fijo rhurahr.

6 Fitoh yimarn Bro Nkifrarhu mrokfeft kak nuhasworko niko tawo maruham o wuskam o yeshrim ndm yakhato hekfot.

7 Mirahko aduka amanyom, “A, nhai mrokfom. Nom nhai bi wom boririfhut rhukahtnom. Tunmoh fijo wiyauyau thombat Bro Nkifrar nhai htiruhatrnom.” Ka Bro Nkifrarhu kusmt frsrfewuko? Na kfiwanko, be tu nhai mif. Tamohtet wuri fanm trufn o nuhte be ndhtet wuri fanm sinyarahm. Nhai tfit kekuthato womhtet wuri fanm sinyaruhatm. 8 Yimar turhu fasoh yima yuhur mhatoh fnahmor afo rhu yakitoh hanitr, nd yimar Bro Nkifrar yak hatohaforuhatrr kaht riyahr. Nd fasoh yima yuhur yak thuhato Bro Nkifrarhu Yafothathu dukefrn hiketr, be nd yimar tu Bro Nkifrarn yak hatohaforuhatrr turpno mtoh nkifranirahr. 9 Ndnettn dborioh dborioh nefroh naneft nom nhai hhrekakhato yafho thukfot. Yakitoh kihhato Bro Nkifrar fitoh yiharn dborioh rhu nmbuhat heshombat nhai rim tohtaruhatnom. 10 Ndnettn nom Jisasr hiket yimanom wom yiham wom Jisasr hikwa yimam htihato kangnom, “Womm dborioh nefm ayak nuhasnomm,” nhai mrokfom. Yo nom wom wom yima bugamn dborioh nefm yak nuhaskfot.

11 Ndar na asomif kforuha mrokfot tukanhu tire wandfamoyant. Nanhu wandfetem nd bro wandfafam. Wahtikahkomm duka marnyakfot! 12 Wawanyko, nd nikmoha nia kfo pthiwa yimam yuwi duka kangm, “Tha pukneft akfokahtnomm Galesia thofm tha pukruhamn nom hingrnayuk hingrneft Judam htiruhamn kfo yindhorrahmnom.” Nd dukeftpno tha pukneft kak tkrurwomko. Duka kangm, “Kfo mirahnom, ‘Bi bgre misn nikmoh fasoh fasoh nefm Kraisr mfha htamorm.’ Inji kforahnom Judam nhai hifa nyingam htaruhatmnom.” Nd dukeftpno inji kfiwumko. 13 Nd yimam rom tha puketm. To nhai Judaroh boririfhut hik marnyakahmt. Be yuwi kangm, “Wommn akfokahtnom, tha apukkahmn, Judam wanyruhamn kfo yindhor mirahm, ‘O hifa hingrneft hingrnewum.’ ” 14 Na nhai inji kfo yindhorkfot. Nanhu kfo yindhorneft nanhu fasoh nefmn mfha htahemo yima Jisas Kraisrhu yufarpatn na kfo yuta hagrha yindhorkfot. Rorn nanhu fasoh nefm mfha htamotrm nhai wom dukakahanm ndar bbinysofthu fasoh nefm. Womrpamn ndar bbinysofthu nefm dukewamn nhai dukakahmt Jisasr mfha htamo nmbuhat. 15 Arihat Bro Nkifrar nhai tha puket yimam o tha puk duha yimam htihato yindhorkahr. Nhai. Yimam tu Bro Nkifrarn yima yuhu yak wus bowuswam, tom ndhtet ruhet yimamn Bro Nkifrar hti yindhorwor. 16 Ndhtet ruhet yimam hti yuhuwafruharmn yak marnya bomarnyahato Bro Nkifrarhu yon kunys rhurahm.

17 Na nhai wom wofnkaha yimam tfit wom krhopam hanyeft. Bi yonmari fhu gifa trukt harhuwa. Nd fhu gifa trukt kfiwut na Jisasrhu hingrna yimaya.

18 Be injirpa nanhu mrokfom. Warhutwako. Bro Nkifrar kukatohaf hanitworko.