1 Yima yak marnya yuk duka yima yuhurn niko dukakfot yakneft. Yo nd Bro Nkifrarhu Yafothat yahuka hingrna duka tungunefroh yak dukefr dukafot. To nd dukefr dukewunome, to afo barkoft profetm hingrnamoa hingrna dukefr, ndr barkofr yakkfot. 2 To yimam Bro Nkifrarhu Yafothatn kasinyahato wom nndoh yarmumatn mrokfom kfo bruttna thoft, nhai yima mifroh kfo hayuk mrokfomn bt yima mifm wanykfot. Nhai. Tu Bro Nkifrarpno kfo hayuk mrokfomn yima mifm wany mmotewum. 3 To profetm Bro Nkifrarpno mrokfom yakhato kfo pthiwa mrokfomn, yimam wanukwamn dukefm yakhato Bro Nkifrar myakitoh nnuhaknitm, yo dukefm kekwom yo nd mrokfom wanyhato yima yuhum bmtewumm. 4 Yimar wom nndoh yarmumat kfo bruttnewar, ror turn inji pthewarn tpi kekwor. To profetr Bro Nkifrarpno mrokfom yakhato kfo pthiwam, nd mrokfom sioshu yimam wanukwamn tpi kekwom. 5 Nanhu yima yuhur kanga wom nndohtet yarmumat kfo bruttnayuk yafothar wayak bugakahkomn wom nndoh yarmumatn wakfo bruttnako. To wom bro dukefr kanga Bro Nkifrarpno profetm mrokfom yakhato mrokfom kfo pthiwa kanjo mrokfom inji wakfo ptha htfasko. Yimar Bro Nkifrarhu Yafothatn mrokfo rifhur thu hmbrihato wom nndoh yarmumatn mrokfo ptha sinyaneft rot hifa, tmift nd mrokfot kfo kekut yimar tohhato kfo kekutkfot. Wom yimarm mrokfom kfo kekutruhatrm tuhant yindars mrokfom wanyhato tpi yakrahm. 6 Bar yinouroko, nd na kfoyuk mrokfom waduka hik marnyatwakomm. Na wom yiham nikompno niahato wom yarmumatn na kfo bruttneya, to nd na kfoyuk kfo bruttna mrokfom finji naruhamko? Na Bro Nkifrarpno yakyuk kafroh mrokfom kfoheruhanko hifa. O Bro Nkifrarhu mrokfo yimbu yuharoh mrokfom kfo nuhasruhanko hifa. O Bro Nkifrarpno yakyuk kfo hta bohta mrokfom kfoheruhanko hifa. O Bro Nkifrarhu yuhat kfo boririfhu nuhasruhanko hifa.

7 Tng duha shrkam, akfonom yirofinym dbint, nd yirofinym dbint yimam yakhato nhai tu yirofinymt yakyuk windohm windohkahm, to yimam finji wany miruham yirofinymt windohwot? 8 Yahrt yiyuk tanmbar nrwir nhaf inji. Yimar guryukr tu tanmbar nrwir kanjo gur hta marnya duha yirahrr, womm finji wany hikruhamn kfo miruham yahrt yiyuk nrwiyer? 9 Niko to inji. Bro Nkifrarhu Yafothatn niko kasinyahato wom nndoh yarmumatn kfo bruttnaneft, womm rhu wanyukm to finji wanyruhamm nd niko kfo pthayuk mrokfom? Mrokfom wany mmotarahmm. 10 Wom mrokfot tfit kfo ptharuha. Ndar bbinysofthu kmi kmim nndoh nndoh yarmumat kfo pthewum. Rpa yarmumat kfetm rom turoh mrokfotn mrokfom nakfo pthahato nawanukm. 11 Wom yimar nanpno niahato turhu yarmumatn kfo pthahato na nhai wanyrfoyanr. Kfo mirahr no wom nndoh nndoh kmi thofeno. 12 Nikmoh yima yuhum kekwanko, kangko Bro Nkifrarhu Yafothathu kasinyewa nefm ayaknom. To nd dukefetekone, sioshu tpi heyuk yafotham yakkfot.

13 To nd nmbuhatpno kfo kanga, yimar wom nndoh yarmumaye kfo bruttnayuk mrokfot Bro Nkifrarhu Yafothat kasinyewutr kfo pthaneft, nd yimar tfit Bro Nkifrarpno akfo bruttnakahtr Bro Nkifrar tfit wom yafothat hirahrr, nd tur kfo bruttnayuk mrokforoh kfo kekutyuk yafothar. 14 Tfit akfo nhombraya. Na wom yarmumatn akfo bruttnaya, nd na kfoyuk mrokfom nhai na yimayanhu dukefr rhuyuk mrokfom kfokaha. Nhai. Mrokfom be tukanhu yafothatn mhfnahnewutm. 15 To ndnettn finji narhoya? Na kfo bruttnaneft, rot yafothat htayuk mrokfom kfo bruttnaruha, to tfit yiro yima yuhur rhuyuk mrokfom kfo bruttnaruha. Yo windohneft nhaf inji. Yafotha htayuk windohyuk windohefm mfnahrahm, yo yiro yima yuhur rhuyuk windohroh windohefm windohruha. 16 Be yafothat htayuk mrokforpam Bro Nkifrar kfo bruttna yindhorrahnr to finji nd yiro lotu swirt rhuyuk yimam wany hik hanyhato wuroh yak dbkafyuk mrokfom miruham, “To be inji?” Wom nndoh yarmumatn mrokfom kfo bruttna hanyetmn yimam nhai wany hik hanyruhatmm. 17 Nd ni kfo bruttnahato kfo yindhoryuk mrokfom hifa kfo yindhorrahnm, to mirahn ka wany yindhorhato tpi yakrahm. Nhai. 18 Na Bro Nkifrar kfo yindhorwanr, nanrpaya wom yarmumatn kfo bruttna hakuta, niko nhai na kanjo wom nndoh yarmumatn kfo bruttnakahko. 19 To na sioshu bro lotu rifiny swirm yinyeft, be tirfa mrokfo nmbuha marnyam, tu yimam wany hik marnyiwam, ndrpam kekwa. Kanga wom nndoh yarmumathu yonmari 10 tausen mrokfo nmbuham yakhato kfo pthiruhanm, yimam nhai wanyhato yima yuhum yakruhatm.

20 Bar yinouroko mirahko yon mumenroh dukefm kanjo nikmoh dukefm arhumnom. Tu bro yimaroh dukefm kanjo rhukfot. Fasoh fasoh nefroh nanefm yon mumenm kanjo inji rhu mmokfot. 21 Bro Nkifrarhu boririfhu mrokfot kfiwut,

23 Ndnettn niko sioshu tuhant yindars rpat rifiny bugahato wo nndoh nndoh yarmumamn mrokfom kfo bruttnarahkomm, nd Bro Nkifrar hik duha yima furam fknenihato wanyruhamn kfo mirahmko, “Mmohato mrokfom wom yarmumamn kfo bruttna mumiwum.” 24 To niko nd profet mrokfom rifiny swirtn ptha hasetkomn nd Bro Nkifrar hik duha yima furam nd niko rifinyyuk kunyr rim fknenihato nd profet mrokfom wanumm, nd mrokfomn tafont htarahmm rroh nefm. 25 Rroh fasoh fasoh dukefm, rhu kafrohyukm, Bro Nkifrar tafont htaruhatrm mtabokme rmonhato nyingatikm yohniruhamn Bro Nkifrar naku kforahm. Bro Nkifrar nakuruhamn kfo mirahm, “Dajohmn, Bro Nkifrar tohnho mifworko.”

26 Bar yimako, ndnettn niko lotu yiha rifinyhato lotuneft inji nakfot. Womr windoheter, rorhu windoht windohkfot. Womr kangr Bro Nkifrarhu mrokfo yimbu yuharoh mrokfom akfo nuhasanm, ror sinyahato kfo pthakfot. Womr Bro Nkifrar wom mrokfom yahutrr kangr nd mrokfom womm akfo nuhasanm, ror nhaf sinyahato rorhu mrokfom kfo pthakfot. O womr wom nndoh yarmumatn kangr akfo bruttnaya, ror sinyahato kfo bruttnakfot. Yo womr Bro Nkifrar nd kfo bruttna mrokforoh kfo kekutyuk yafothar yahutrr kangr apthaya, be tfit rorn sinyahato nd womr wom yarmumatn kfo bruttnayuk mrokfom rorn tfit kfo kekutkfot. Nd tamoh tamoh nefm niko nayukm, sioshu met yindarim htiruhamn yo wanyruhamn tpi yakrahm. Ndnettn lotu yiham rifinyhato loturahnom, inji inji hingrna hikkfot. 27 Kangm wom yimam wom nndoh yarmumatn akfo bruttnanom, husf o husfirpa yimarpam kfo bruttnakfot. Nhai be rpat tipetm sinyahato mrokfom kfo bruttnakfot. Nhai. Rpa rpa sinyahato kfo bruttnakfot. Yo mrokfo kfo kekutyukm rom nhaf yimam nhombrahato tohhato mrokfom kfo kekutkfot. 28 Nd yimam kfo bruttnayuk mrokforoh kfo kekutyuk yimam kak hambriwokome, to be nd wom yarmumat kfo bruttnayuk yimam tohhato kfo bruttna duha. Be nhowi rhuhato yima yuhurio Bro Nkifrarparpno kfo bruttnakfot. 29 Yo Bro Nkifrarpno mrokfo yakyuk yimam kfo pthaneft hus yimaf o husfirpa yimarpam mrokfom kfo pthakfot. Womm be rhuhato nd rom kfo pthayuk mrokfom wanyhato yak nhtakfot. 30 Yo wom yimar Bro Nkifrarhu mrokfot kfo ptha hanitrn, tfit nd rifiny swirt rhuyukm Bro Nkifrar womr wom mrokfom yahutrr kangr sinya tohhato akfo pthaya, nd barkof yimar afo rorhu mrokfom kfo ptha tmbhonikfot. Bi kfo ptha tmbhonirm ee btn womr sinyahato rorhu mrokfom kfo pthakfot. 31 Lotu yiharoh hingrna yuham inji yi marnyarahm. Htirahko womr pthayuk mrokfomn wom dukefm yakrahm tift womrpno wom dukefm yakrahm tfit womrpno wom dukefm yakrahm, yima yimam kfo pthayuk mrokfom sioshu met yindarim wany hik bohikakruhamn dukefm yakruhamn toh bmtarahm. 32-34 Bro Nkifrar nhai mekahr mrokfom rpatn nathu mrkaknihato tfit womroh yima yuhum myak mmotarahmm. Nhai. Kangr mrokfo kfo pthaneft rpa rpa kfo pthahato rpa yima yuhur rhurahnom. Ndnettn yimam Bro Nkifrarpno mrokfom yakhato mrokfo kfo ptharahm, nhai be rpat sinyahato mrokfom thu mrkaknikfot. Rpa rpa sinyahato mrokfom kfo pthakfot.

Bro Nkifrarhu yimaroh lotu rifiny swir bugam metm sinyahato mrokfom kfo ptha duha. Mosesr kfo boririfhumo mrokfot hikhato metm rom be yindariroh yinhitn rhukfot. 35 Nd lotu swirtn wom mett wom yima yuhur nietrt kangt akfo ttiwona, nhai tuha rifiny swirtn sinyahato kfo ttiwonkfot. Inji naraht fasoh yimtnayuk neft naraht. Tamoh ttiwon nmbuham korhm kto kunyko yihato tuthu ramemrn kfo ttiwonkfot. 36 Tone finji? Nd Bro Nkifrarhu mrokfote ka nikompno misuh gungonmot? Ka nikomrpakomn mrokfot fakmokomtn, womme ka nhai yakrmomt? 37 Wom yimarhu dukeft duka kangr, Bro Nkifrarpno mrokfom yakhato met yindarimpno kfo ptha he htfasyuk yimaya, o duka kangr Bro Nkifrarhu Yafothat kasinyet yimaya, nd yimar adukatwart ndar na wandfiwa mrokfot, Bro Nungothetrhu boririfhu nuhasyuk mrokfoyet. 38 Nd yimar ndar na wandfiwa kfo nuhas mrokfom nhai hikkahrm, kfiwanko nd yimar mirahko aduka amanyom ka nd Bro Nkifrarpno mrokfom yakhato womm kfo hanyeft ka tu Bro Nkifrarn nd hingrneft hemorr. Nhai. 39 Ndnettn, bar yinouroko, Bro Nkifrarpno mrokfom yakhato met yindarimpno mrokforoh kfo ptha habrinyeft, ndt niko Bro Nkifrar kfo ttiwonhato nd hingrnaneft yakkfot. Yimam Bro Nkifrarhu Yafothat kasinyewattm wom nndoh yarmumatn kfo bruttnewum, niko mirahko akfo rafonomm. 40 Tmifm lotu yiharoh hingrnefroh yak hta bohta marnya nmbuhamn yak hta bohta marnyakfot.