1 Kantzꞌibꞌaj pan che alaq puwi ri qa hermana Febe, ri e kukꞌil raj chakibꞌ e toꞌbꞌel pa riglesia kꞌo Cencrea; rire uchꞌobꞌom kopon ukꞌ alaq. 2 Kantzꞌonoj ko che alaq, kꞌulu alaq chi utz wa hermana pa rubꞌiꞌ ri Qanimajawal Jesucristo jelaꞌ pachaꞌ ri taqalik kaꞌan chikixoꞌl ri kikojom rubꞌiꞌ ri Cristo. Toꞌo ko alaq rukꞌ taq janipa ri kajawax che, ma rire lik e kꞌi ri ebꞌutoꞌom y lik ne inutoꞌom riꞌin.

3 Yaꞌa alaq rutzil kiwach ri Priscila y ri Aquila, ri e wachbꞌiꞌil pa ruchak ri Qanimajawal Jesucristo. 4 Yey xtewun ne ri kamik pakiwi rike ruma xinkitoꞌo. E uwariꞌche, na xew ta riꞌin kintioxin pan chike, ma ketioxin pan konoje riglesias ke ri na e ta aj Israel.

5 Yaꞌa alaq rutzil kiwach konoje ri hermanos ri kakimol kibꞌ pa kocho ri Aquila y ri Priscila.

Yaꞌa alaq rutzil uwach ri Epeneto, ri lik kꞌax kannaꞌo, ma e rire ri nabꞌe xukoj rubꞌiꞌ ri Cristo wara Acaya.

6 Yaꞌa alaq rutzil uwach ri María, ri lik chakuninaq chixoꞌlibꞌal alaq.

7 Yaꞌa alaq rutzil kiwach ri Andrónico y ri Junias; ri e watz-nuchaqꞌ yey xekꞌojiꞌ junam wukꞌ pa cárcel. Rike lik kaloqꞌox kiqꞌij chiqaxoꞌl ri oj utaqoꞌn ri Jesús, yey rike xkikoj rubꞌiꞌ ri Cristo nabꞌe chinuwach riꞌin.

8 Yaꞌa alaq rutzil uwach ri Amplias, jun hermano lik kꞌax kannaꞌ chupa rubꞌiꞌ ri Qanimajawal.

9 Yaꞌa alaq rutzil uwach ri Urbano; rire e jun qachbꞌiꞌil pa ruchak ri Cristo.

Yaꞌa alaq rutzil uwach ri Estaquis, jun hermano lik kꞌax kannaꞌ riꞌin.

10 Yaꞌa alaq rutzil uwach ri Apeles, ri lik ukꞌutum ri kubꞌulibꞌal ukꞌuꞌx rukꞌ ri Cristo.

Yaꞌa alaq rutzil kiwach konoje ri e kꞌo pa rocho ri Aristóbulo.

11 Yaꞌa alaq rutzil uwach ri watz-nuchaqꞌ Herodión.

Yaꞌa alaq rutzil kiwach konoje ri e kꞌo pa rocho ri Narciso, ri kikojom rubꞌiꞌ ri Qanimajawal.

12 Yaꞌa alaq rutzil uwach ri Trifena y ri Trifosa; rike lik kiyaꞌom kibꞌ pa ruchak ri Qanimajawal.

Yaꞌa alaq rutzil uwach ri Pérsida, ri lik kꞌax kanaꞌik yey lik chakuninaq pa ruchak ri Qanimajawal.

13 Yaꞌa alaq rutzil uwach ri Rufo; waꞌ e jun hermano lik chom rubꞌinik usilabꞌik chwach ri Qanimajawal. Yey yaꞌa alaq rutzil uwach ruchu, ma rire uꞌanom pachaꞌ nuchu riꞌin.

14 Yaꞌa alaq rutzil kiwach ri Asíncrito, ri Flegonte, ri Hermas, ri Patrobas, ri Hermes y ri jujun chik hermanos e kꞌo kukꞌ rike.

15 Yaꞌa alaq rutzil kiwach ri Filólogo y ri Julia, ri Nereo rukꞌ ri ranabꞌ yey ri Olimpas kukꞌ konoje rutinamit ri Dios e kꞌo kukꞌ rike.

16 Yaꞌa rutzil wach alaq chiwach alaq rukꞌ jun saqil tzꞌubꞌuj chiꞌaj chwach ri Dios.* Ri Pablo jewaꞌ xubꞌiꞌij ma rike e kakiꞌan waꞌ chikiwach echiriꞌ kakiya rutzil kiwach.

Konoje ri hermanos wara re pa taq riglesias re ri Cristo kakiya pan rutzil wach alaq.

17 Lik kꞌu kantzꞌonoj che alaq hermanos, e lik kachajij ibꞌ alaq chikiwach ri kakijach upa riglesia y kakikoj tzaqibꞌal chirij ri saqil kꞌutunik chaꞌ e kꞌo jujun chik na kakikoj ta ri kꞌulum chi ralaq. Chikij kꞌu waꞌ, chesaj ibꞌ alaq; 18 ma na e ta kitaqem ri Cristo, e lik kitaqem ri kirayibꞌal rike. Ri kichꞌaꞌtem lik chakojoꞌ y lik chom katatajik, pero rukꞌ waꞌ kekisok ri tikawex na jinta ko kinaꞌoj.

19 Lik kꞌut etaꞌmatal chi kuma konoje e lik taqem alaq ri saqil kꞌutunik, y lik kinkiꞌkot che alaq ruma waꞌ. Yey ri kuaj che alaq e lik kꞌola naꞌoj alaq che uꞌanik ri utz, na che ta uꞌanik ri na utz taj. 20 Ekꞌu ri Dios, ri aj yaꞌl utzil chomal, na kamayin ta che kuyiqꞌilibꞌej uwiꞌ ri Satanás chuxeꞌ ri aqan alaq; ma e kuya che alaq ri kachꞌij alaq uchuqꞌabꞌ ri Satanás. Kꞌulu kꞌu alaq ri unimal rutzil ukꞌuꞌx ri Qanimajawal Jesucristo.

21 Kuya pan rutzil wach alaq ri Timoteo, ri wachbꞌiꞌil pa ruchak ri Cristo. Jenelaꞌ kakiya pan rutzil wach alaq ri e watz-nuchaqꞌ Lucio, ri Jasón y ri Sosípater.

22 Yey riꞌin in Tercio, ri kintajin che utzꞌibꞌaxik waꞌ wa carta e chirij ri kubꞌiꞌij ri Pablo che alaq, kanya pan rutzil wach alaq pa rubꞌiꞌ ri Qanimajawal.

23 Ri Gayo kuya pan rutzil wach alaq; rire inukꞌulum pa rocho y uyaꞌom chike konoje ri hermanos ri e aj wara kakimol kibꞌ pa rocho. Jenelaꞌ kuya pan rutzil wach alaq ri Erasto, ri aj kꞌolol puaq re wa tinamit; jenelaꞌ ri hermano Cuarto kuya pan rutzil wach alaq.

24 Ri unimal rutzil ukꞌuꞌx ri Qanimajawal Jesucristo kꞌola ukꞌ onoje alaq. Amén.

25 Qayaka kꞌu uqꞌij ri Dios, ri kꞌo puqꞌabꞌ kutikibꞌaꞌ alaq chi utz chupa ri Utzilaj Tzij re ri Qanimajawal Jesucristo, ri nutzijom loq. Waꞌ e puwi ri na uqꞌalajisam ta lo ri Dios ojertan, 26 yey ekꞌu woꞌora xqꞌalajisax chiqawach. Jekꞌulaꞌ kaqꞌalajin chi utz ri tzꞌibꞌital kan puwi ri Qꞌijsaq chupa Ruchꞌaꞌtem ri Dios kuma ri qꞌalajisanelabꞌ. Ri Dios, ri na jinta utaqexik rukꞌaslemal, e xtaqan che katzijox ri Qꞌijsaq puwi ri Cristo chike konoje rukꞌiyal kiwach taq ri tikawex e kꞌo che ruwachulew. Xuꞌan kꞌu waꞌ chaꞌ rike kaketaꞌmaj wa Qꞌijsaq, kakikoj utzij Rire y kakubꞌiꞌ kikꞌuꞌx rukꞌ. 27 Xa jun ri Dios kꞌolik y xew Rire lik kꞌo unaꞌoj. Che kꞌu Rire taqal wi kaqayak uqꞌij na jinta utaqexik ruma ri xuꞌan ri Qanimajawal Jesucristo. Amén.