1 Kꞌo kꞌu jun achi yewaꞌ, Lázaro rubꞌiꞌ. Rire aj Betania, y chilaꞌ ejeqel wi ri ranabꞌ María y Marta. 2 Waꞌ wa María e ri xuqꞌej kunabꞌal lik kiꞌ ruxlabꞌ che ri raqan ri Jesús y xuchaqisaj rukꞌ ruwiꞌ.* Jn. 12:1-8 3 Ekꞌu ri kebꞌ ixoqibꞌ kichaqꞌ kibꞌ jewaꞌ xkitaq ubꞌiꞌxikil che ri Jesús: «Qajawal, ri jun lik kꞌax kanaꞌ la, lik yewaꞌ.»

4 Echiriꞌ ri Jesús xuta waꞌ, jewaꞌ xubꞌiꞌij: «Waꞌ wa yabꞌil na re ta kamik, ma re yakbꞌal uqꞌij ri Dios y re yakbꞌal uqꞌij Rukꞌajol ri Dios» xchaꞌ.

5 Ekꞌu ri Jesús lik kꞌax kebꞌunaꞌ ri oxibꞌ kichaqꞌ kibꞌ: Ri Marta, ri María y ri Lázaro. 6 Na rukꞌ ta kꞌu riꞌ, echiriꞌ xuto yewaꞌ ri Lázaro, kꞌa xkanaj chi kan kebꞌ qꞌij pa ri luwar pa kꞌo wi. 7 Tekꞌuchiriꞌ, xubꞌiꞌij chike rutijoꞌn:

—Joꞌ tanchi Judea —xchaꞌ.

8 Ekꞌu rutijoꞌn xkibꞌiꞌij che:

—Lal tijonel, ¿na kꞌakꞌ ta nebꞌa laꞌ raj judiꞌabꞌ ya laj xkikamisaj la paꞌbꞌaj? Na rukꞌ ta kꞌu riꞌ, ¿woꞌora keꞌek tanchi la chilaꞌ? —xechaꞌ.

9 Ri Jesús xubꞌiꞌij chike:

—¿Na qatzij ta nebꞌa laꞌ kabꞌlajuj ora kꞌo che ri jun qꞌij? Yey e junoq kabꞌin paqꞌij na kuchiq ta ri raqan, ma karil rubꞌe ruma ri qꞌijsaq re ruwachulew. 10 Noꞌj we junoq kabꞌin chaqꞌabꞌ, riꞌ kuchiq ri raqan ma pa qꞌequꞌm kꞌo wi —xchaꞌ.

11 Tekꞌuchiriꞌ, xubꞌiꞌij chike:

—E ri qamigo Lázaro, kawarik. Kinꞌek kꞌu che ukꞌosoxik —xchaꞌ.

12 Xkibꞌiꞌij kꞌu rutijoꞌn che:

—Qajawal, utz we kawarik, ma riꞌ e kꞌutubꞌal re kutzir uwach —xechaꞌ. 13 Ri xkichꞌobꞌ rike e xa kuxlan ri Lázaro; noꞌj ri Jesús e kachꞌaꞌt puwi rukamik ri Lázaro.

14 E uwariꞌche ri Jesús xuqꞌalajisaj chike:

—Ri Lázaro kaminaq chik. 15 Yey iwuma kꞌu riꞌix, lik kinkiꞌkotik ri na in jinta chilaꞌ rukꞌ echiriꞌ xkamik, ma jelaꞌ kanimar ri kubꞌulibꞌal ikꞌuꞌx wukꞌ. Woꞌora joꞌ, jeꞌqilaꞌ —xchaꞌ.

16 Ekꞌuchiriꞌ, ri Tomás ri kabꞌiꞌx “Yoꞌx” che, xubꞌiꞌij chike ri jujun chik rachbꞌiꞌil:

—Kojꞌek riꞌ chaꞌ jelaꞌ kojkam junam rukꞌ ri Jesús —xchaꞌ.

17 Kajibꞌ qꞌij chi lo riꞌ muqutal ri Lázaro echiriꞌ ri Jesús xopon Betania. 18 Waꞌ xa chunaqaj Jerusalem kꞌo wi, laj oxibꞌ kilómetro kꞌo wi lo che. 19 E kꞌi chike raj judiꞌabꞌ e petinaq kukꞌ ri María y ri Marta re koꞌlkibꞌochiꞌij kikꞌuꞌx ruma rukamik ri kixibꞌal. 20 Ekꞌuchiriꞌ ri Marta xuto katajin roponik ri Jesús, xel bꞌi che ukꞌulik; noꞌj ri María xkanaj kan chwa ja.

21 Ekꞌu ri Marta xubꞌiꞌij che ri Jesús:

—Wajawal, we ta e laꞌ kꞌo la wara, na kakam ta riꞌ ri nuxibꞌal. 22 Na rukꞌ ta kꞌu riꞌ, lik wetaꞌam, tobꞌ ne kꞌa e waꞌ, ri Dios kuya cheꞌla ronoje ri katzꞌonoj la che —xchaꞌ.

23 Ri Jesús xubꞌiꞌij che:

—Raxibꞌal kakꞌastaj lo chikixoꞌl ri ekaminaq —xchaꞌ.

24 Ri Marta xubꞌiꞌij che:

—Qatzij, riꞌin wetaꞌam kakꞌastaj lo che ri kꞌisbꞌal qꞌij re ruwachulew echiriꞌ kekꞌastaj lo konoje ri ekaminaq —xchaꞌ.

25 Ri Jesús xubꞌiꞌij che:

—E riꞌin ri kinkꞌastajisan lo ke ri ekaminaq yey e riꞌin ri kinyaꞌw kꞌaslemal. China kꞌu ri kakubꞌiꞌ ukꞌuꞌx wukꞌ, tobꞌ kakamik, kakꞌastajik. 26 Yey konoje ri e kꞌaslik y kakubꞌiꞌ kikꞌuꞌx wukꞌ, na kekam taj ma kꞌo kikꞌaslemal na jinta utaqexik rukꞌ ri Dios. ¿Kakoj riꞌat waꞌ? —xchaꞌ.

27 Ri Marta xukꞌul uwach:

—Kankojo, Wajawal, ma riꞌin nukojom rilal lal ri Cristo, Rukꞌajol ri Dios, ri bꞌiꞌtisim loq kakꞌun che ruwachulew —xchaꞌ.

28 Echiriꞌ ri Marta xukꞌis ubꞌiꞌxik waꞌ, xeꞌek che usikꞌixik ruchaqꞌ María y xew che rire xubꞌiꞌij:

—Ri Qajawal kꞌo wara y katusikꞌij —xchaꞌ.

29 Xew xuta waꞌ ri María, na jampatana xyaktaj bꞌi y xeꞌrila ri Jesús. 30 Ri Jesús kꞌamajaꞌ ne kok pa ri tinamit, ma kꞌa kꞌo pa ri luwar pa xkꞌul wi ruma ri Marta.

31 Ekꞌu raj judiꞌabꞌ e kꞌo rukꞌ ri María re kakibꞌochiꞌij ukꞌuꞌx, xkilo echiriꞌ na jampatana xyaktajik y kanik xel bꞌi. Rike xeterej kꞌu bꞌi chirij, ma e chikiwach rike e riꞌ keꞌek chwa ri muqubꞌal chaꞌ keꞌroqꞌej ruxibꞌal.

32 Echiriꞌ ri María xopon pa kꞌo wi ri Jesús, xew xril uwach, xuxuk ribꞌ chwach, y jewaꞌ xubꞌiꞌij che:

—Wajawal, we ta e laꞌ lal kꞌo la wara, na kakam ta riꞌ ri nuxibꞌal —xchaꞌ.

33 Ri Jesús echiriꞌ xrilo lik kebꞌoqꞌ ri María y raj judiꞌabꞌ eteran lo chirij, lik xok chukꞌuꞌx y xuchap bꞌis. 34 Xubꞌiꞌij kꞌu chike:

—¿Pa ximuq wi? —xchaꞌ.

Rike xkibꞌiꞌij:

—Qajawal, peta la y chilape la —xechaꞌ.

35 Ekꞌu ri Jesús xoqꞌik.

36 Xkibꞌiꞌij kꞌu raj judiꞌabꞌ:

—¡Chilape alaq, lik kꞌax kunaꞌo! —xechaꞌ.

37 E kꞌo jujun chike raj judiꞌabꞌ xkibꞌiꞌij:

—Wa waꞌchi e xtzuꞌnisan re ri jun potzꞌ. ¿Suꞌbꞌe kꞌu riꞌ na jinta xuꞌano chaꞌ na kakam ta ri Lázaro? —xechaꞌ.

38 Ri Jesús lik xok tanchi bꞌis chukꞌuꞌx, xqibꞌ chwa ri muqubꞌal. Waꞌ jun jul worotal paꞌbꞌaj y tzꞌapal uchiꞌ rukꞌ jun abꞌaj. 39 Ekꞌu ri Jesús xubꞌiꞌij:

—Chiwesaj laꞌbꞌaj —xchaꞌ.

Yey ri Marta, ri ranabꞌ kan ri kaminaq, xubꞌiꞌij che:

—Wajawal, laꞌ lik chu chik, ma e ukaj qꞌij waꞌ muqutalik —xchaꞌ.

40 Ri Jesús xubꞌiꞌij che:

—¿Na nubꞌiꞌim ta nebꞌa chawe, we kakubꞌiꞌ akꞌuꞌx wukꞌ, kawil runimal uwach uqꞌij ri Dios? —xchaꞌ.

41 Ewi xkesaj rabꞌaj kꞌo chuchiꞌ ri muqubꞌal.

Ekꞌuchiriꞌ, ri Jesús xtzuꞌn chikaj y xubꞌiꞌij:

—Lal Nuqaw, maltiox ko cheꞌla ma intom chi la. 42 Riꞌin wetaꞌam lik xaqi kinta la, pero kambꞌiꞌij kꞌu waꞌ kuma wuꞌkꞌiyal tikawex e kꞌo wara, chaꞌ rike kakikojo lal taqayom lo we —xchaꞌ.

43 Echiriꞌ xukꞌis ubꞌiꞌxikil waꞌ, lik ko xsikꞌin che ubꞌiꞌxikil:

—¡Lázaro, chateluloq! —xchaꞌ.

44 Ewi ri Lázaro xel loq, bꞌolqꞌotim ri raqan y ruqꞌabꞌ pa kꞌul yey rupalaj chꞌuqutal rukꞌ jun kꞌul. Ruma kꞌu laꞌ, ri Jesús xubꞌiꞌij chike:

—Chikira ri kꞌul kꞌo che chaꞌ utz keꞌek —xchaꞌ.

45 E kꞌi kꞌu chike raj judiꞌabꞌ, ri e petinaq che ubꞌochiꞌixik ukꞌuꞌx ri María, echiriꞌ xkil ri xuꞌan ri Jesús, xkikubꞌaꞌ kikꞌuꞌx rukꞌ. 46 Noꞌj e kꞌo jujun chike xebꞌek kukꞌ ri fariseos, y xeꞌkitzijoj chike ri xuꞌan ri Jesús.

47 Ekꞌu ri nimaq e aj chakunel pa Rocho Dios y ri fariseos xkimol kibꞌ kukꞌ jujun chik chike ri e aj qꞌatal tzij y jewaꞌ xkibꞌiꞌij:

—¿Saꞌ ri kaqaꞌano? Ma waꞌchi lik ukꞌiyal kꞌutubꞌal re ruchuqꞌabꞌ kuꞌano. 48 We na kaqaqꞌatej taj, konoje kakubꞌiꞌ kikꞌuꞌx rukꞌ y kekꞌun kꞌu lo riꞌ raj wach re Roma chaꞌ koꞌlkiwulij wa Luwar pa kaqaloqꞌnimaj wi ri Dios y wa qatinamit —xechaꞌ.

49 Ekꞌuchiriꞌ ri Caifás, ri kajawal raj chakunel pa Rocho Dios che laꞌ la junabꞌ, jewaꞌ xubꞌiꞌij chike:

—Ralaq na jinta etaꞌam alaq. 50 Na kachꞌobꞌ ta alaq raqan chi utz, ma e más utz we xa jun chi achi kakam pukꞌaxel ri tinamit chwa ri kasach kiwach konoje ri qatinamit —xchaꞌ.

51 Ri Caifás na xa ta pa re rire xubꞌiꞌij waꞌ. Ma ruma e kajawal raj chakunel pa Rocho Dios che laꞌ la junabꞌ, ri Dios xuya che kuqꞌalajisaj e kakam ri Jesús pakikꞌaxel konoje ri tinamit e aj judiꞌabꞌ. 52 Y na xew ta kuma ri tinamit Israel xkam ri Jesús, ma xkamik chaꞌ kuꞌan xa jun chike konoje ri e ralkꞌoꞌal ri Dios ekicherinaq bꞌi che ruwachulew.

53 Ekꞌu raj judiꞌabꞌ chwi laꞌ la qꞌij wi xkiꞌan tzij chikiwach chaꞌ kakikamisaj ri Jesús. 54 Ruma kꞌu waꞌ, ri Jesús na xbꞌin ta chi chikixoꞌl chiwachil. Ewi xel bꞌi pa ri luwar re Judea y xeꞌek chunaqaj ri luwar katzꞌintzꞌotik, pa jun tinamit Efraín rubꞌiꞌ. Chiriꞌ xkanaj kan wi junam kukꞌ rutijoꞌn.

55 Xa naqaj chi kꞌo wi lo ri Pascua, waꞌ e kinimaqꞌij raj judiꞌabꞌ. Ukꞌiyal winaq re taq ri tinamit xepaqiꞌ Jerusalem re kakiꞌan ri kijosqꞌikil chwach ri Dios,* Chupa ri Tzij Pixabꞌ tzꞌibꞌital kan ruma ri Moisés kubꞌiꞌij saꞌ taq ri kajawaxik kakiꞌan ri tikawex we xkichꞌulaj kibꞌ o we kꞌo xkichapo lik chꞌul y rukꞌ waꞌ na utz taj kakiꞌan juna nimaqꞌij chwach ri Dios. Chirajawaxik kꞌu riꞌ nabꞌe na kakiꞌan ri kijosqꞌikil chwach ri Dios. Lv. 7:21; Nm. 9:1-13 y 2 Cr. 30:17-18 chaꞌ jelaꞌ taqal chike kakiꞌan ri nimaqꞌij Pascua. 56 E taq kꞌu ri winaq ketajin che utzukuxik ri Jesús, yey echiriꞌ e kꞌo pa ri Rocho Dios, kakitzꞌonobꞌej chikiwach: «¿Saꞌ nawi kichꞌobꞌ riꞌix? ¿Kakꞌun nawi pa wa nimaqꞌij?» kechaꞌ.

57 Yey ri fariseos kukꞌ ri nimaq e aj chakunel pa Rocho Dios etaqaninaq che we kꞌo junoq karetaꞌmaj pa kꞌo wi ri Jesús, chubꞌiꞌij chaꞌ keꞌkichapa uloq.