1 Kꞌate tanchi kꞌu riꞌ, ri Jesús xuqꞌaxuj ri mar re Galilea, ri kabꞌiꞌx mar re Tiberias che. 2 Yey ukꞌiyal winaq eteran chirij ma kilom taq ri kꞌutubꞌal re ruchuqꞌabꞌ kuꞌan kukꞌ ri yewaꞌibꞌ.

3 Ekꞌuchiriꞌ, ri Jesús xel bꞌi chwa jun juyubꞌ y xtzꞌuyiꞌ chilaꞌ junam kukꞌ rutijoꞌn. 4 Xa naqaj chi kꞌo wi lo ruqꞌijol ri Pascua, ri kinimaqꞌij raj judiꞌabꞌ.

5 Echiriꞌ ri Jesús xeril rukꞌiyal winaq e petinaq rukꞌ, xubꞌiꞌij kꞌu che ri Felipe:

—¿Pa keꞌqaloqꞌo wi kiwa konoje wuꞌkꞌiyal winaq chaꞌ kewaꞌik? —xchaꞌ.

6 Xubꞌiꞌij waꞌ che ri Felipe xa re kꞌambꞌal upa, ma Rire retaꞌam chik saꞌ ri kuꞌano.

7 Ri Felipe xukꞌul uwach:

—E laꞌ kaloqꞌiꞌ pam rukꞌ rajil kebꞌ ciento qꞌij re chak, na kuꞌan taj tobꞌ ne xa jutaq bꞌiqꞌ kayaꞌiꞌ chikijujunal —xchaꞌ.

8 Ewi jun chike rutijoꞌn (waꞌ e ri Andrés, ri kichaqꞌ kibꞌ rukꞌ ri Pedro) xubꞌiꞌij che ri Jesús:

9 —Kꞌo jun ralko ala wara rukꞌaꞌam woꞌobꞌ pam re cebada y kaꞌibꞌ kar; pero ¿saꞌ ko uchak waꞌ che wa ukꞌiyal winaq? —xchaꞌ.

10 Xubꞌiꞌij kꞌu ri Jesús:

—Chibꞌiꞌij chike konoje ri winaq ketzꞌuyiꞌik —xchaꞌ.

Lik kꞌut kꞌo rax kꞌim pa ri e kꞌo wi y xetzꞌuyiꞌ laj e lo woꞌobꞌ mil chi achijabꞌ.

11 Ekꞌuchiriꞌ, ri Jesús xukꞌam ri pam, xutioxij che ri Dios y xujach chike rutijoꞌn. Y rike xkijach chike ri winaq etzꞌulik. Jekꞌulaꞌ xuꞌan che ri kar. Xuya chikijujunal janipa ri kakaj. 12 Echiriꞌ ri winaq lik xenoj chi utz, ri Jesús xubꞌiꞌij chike rutijoꞌn:

—Chimolo ri chꞌaqaꞌtaꞌq kiqax chaꞌ na jinta kꞌo kakꞌaq bꞌi —xchaꞌ.

13 Xkimol kꞌu ri chꞌaqaꞌtaꞌq kiqax na xkitij ta che ri woꞌobꞌ pam re cebada y rukꞌ waꞌ xkinojisaj kabꞌlajuj chakach. 14 Ekꞌu ri winaq, echiriꞌ xkil wa kꞌutubꞌal re ruchuqꞌabꞌ ri Dios xuꞌan ri Jesús, jewaꞌ xkibꞌiꞌij: «Paqatzij wi, waꞌ e ri jun Qꞌalajisanel qoyeꞌem kakꞌun che ruwachulew» xechaꞌ.

15 Pero ri Jesús ruma retaꞌam chik kakaj kakikꞌam bꞌi re kakiꞌan rey che, xresaj bꞌi ribꞌ chikixoꞌl y xel bꞌi chwa ri juyubꞌ chaꞌ kakꞌojiꞌ utukel.

16 Echiriꞌ xok raqꞌabꞌ, rutijoꞌn ri Jesús xeqaj chuchiꞌ ri mar. 17 Xebꞌok bꞌi chupa jun barco y ekꞌu riꞌ keqꞌax chꞌaqa yaꞌ chaꞌ kebꞌopon Capernaúm; ma lik qꞌequꞌm chik y ri Jesús na kꞌuninaq taj.

18 Xpe kꞌu jun kaqjiqꞌ chwi ri mar y ri tew xujeq kuxulkꞌatilaꞌ ri yaꞌ. 19 Echiriꞌ ebꞌininaq chi laj woꞌobꞌ o waqibꞌ kilómetro chwi ri mar, kꞌate xkilo kabꞌin ri Jesús chwi ri yaꞌ, e riꞌ katajin roponik chunaqaj ri barco; y rike lik xkixiꞌij kibꞌ che.

20 Noꞌj ri Jesús xubꞌiꞌij chike:

—¡Mixiꞌij iwibꞌ, ma riꞌin in Jesús! —xchaꞌ.

21 Ewi rike lik kekiꞌkotik xkikꞌul ri Jesús chupa ri barco. Tekꞌuchiriꞌ, xebꞌopon pa ri luwar pa kebꞌek wi.

22 Chukaꞌm qꞌij kꞌut, ri winaq ekanajinaq kan chꞌaqa mar xkinaꞌbꞌej rutijoꞌn ri Jesús ebꞌenaq chi chupa ri barco ri xew riꞌ kꞌo chiriꞌ iwir lo riꞌ, yey ri Jesús na xeꞌek ta kukꞌ rutijoꞌn. 23 Xekꞌun kꞌu lo jujun barcos e petinaq Tiberias, chunaqaj ri luwar pa xtijiꞌ wi ri pam, echiriꞌ ri Qanimajawal utioxim chi waꞌ che ri Dios. 24 Echiriꞌ ri winaq xkilo na jinta ri Jesús chiriꞌ y na e jinta ne rutijoꞌn, xebꞌok bꞌi chupa wa barcos y xebꞌek Capernaúm chaꞌ kakitzukuj ri Jesús.

25 Echiriꞌ xebꞌopon ri winaq chꞌaqa mar, xeꞌkiriqa ri Jesús y xkitzꞌonoj che:

—Lal tijonel, ¿jampa xkꞌun la wara? —xechaꞌ.

26 Ekꞌu ri Jesús xubꞌiꞌij chike:

—Paqatzij wi kambꞌiꞌij che alaq: Kintzukuj alaq xa ruma lik xwaꞌ alaq chi utz y xnoj alaq chi utz, na e ta ruma xmaj alaq usukꞌ taq ri kꞌutubꞌal re ruchuqꞌabꞌ ri Dios nuꞌanom loq. 27 Maya kꞌu ibꞌ alaq che utzukuxik ri wa xa kakꞌisik; e lik yaꞌa ibꞌ alaq che utzukuxik ri wa na kikꞌow ta kꞌana uqꞌij, ri kuya kꞌaslemal na jinta utaqexik. Yey ri kayaꞌw waꞌ che alaq, e Ralaxel Chikixoꞌl Tikawex, ri chaꞌtal lo ruma ri Qaqaw Dios re kuꞌan waꞌ —xchaꞌ.

28 Xkitzꞌonoj kꞌu che:

—¿Saꞌ taq ri kaqaꞌano chaꞌ e kaqaꞌan janipa ri karaj ri Dios chiqe? —xechaꞌ.

29 Ri Jesús xukꞌul uwach:

—Ri karaj ri Dios kaꞌan alaq, e ri kakubꞌiꞌ kꞌuꞌx alaq rukꞌ ri jun utaqom lo Rire —xchaꞌ.

30 Ekꞌuchiriꞌ xkitzꞌonoj che:

—¿Saꞌ ri kꞌutubꞌal re ruchuqꞌabꞌ ri Dios kaꞌan la chiqawach chaꞌ kaqilo y jelaꞌ kakubꞌiꞌ qakꞌuꞌx ukꞌ la? ¿Saꞌ ri kariq la uꞌanik? 31 Ma ri qatiꞌ-qamam ojertan xkitij ri maná pa ri luwar katzꞌintzꞌotik,* Éx. 16:4 jelaꞌ pachaꞌ ri kubꞌiꞌij Ruchꞌaꞌtem ri Dios:

32 Ri Jesús xukꞌul uwach:

—Paqatzij wi kambꞌiꞌij che alaq: Na e ta ri Moisés xyaꞌw re ri pam petinaq chilaꞌ chikaj; e ri Nuqaw ri kayaꞌw ri saqil pam kape chilaꞌ chikaj. 33 Ma ri Pam kuya ri Dios e ri jun petinaq chilaꞌ chikaj, ri kayaꞌw kꞌaslemal chike ri tikawex —xchaꞌ.

34 Xkitzꞌonoj kꞌu che:

—Qajawal, yaꞌa ko la qeꞌoj riꞌ laꞌ la pam ronoje qꞌij —xechaꞌ.

35 Ri Jesús xubꞌiꞌij chike:

—In ri in pam kuya kꞌaslemal. China ri kape wukꞌ riꞌin, na kutij ta chi numik; y china ri kakubꞌiꞌ ukꞌuꞌx wukꞌ, riꞌ na kachaqij ta chi kꞌana uchiꞌ.

36 »Pero e pachaꞌ ri nubꞌiꞌim chi lo che alaq: Ralaq na kakubꞌiꞌ ta kꞌuꞌx alaq wukꞌ, tobꞌ ne ilom alaq nuwach. 37 Ma konoje ri keyaꞌiꞌ chwe ruma ri Nuqaw, kekꞌun wukꞌ riꞌin; yey china kꞌu riꞌ ri kape wukꞌ riꞌin, na kanmachꞌaj tubꞌi.

38 »Riꞌin na ximpe ta chilaꞌ chikaj xa re koꞌlnuꞌana ri kuaj riꞌin, ma e in petinaq re koꞌlnuꞌana ri karaj ri Jun xtaqaw lo we. 39 Yey ri karaj ri Nuqaw, ri xintaqaw loq, e na kanjam ta kan junoq chike ri ebꞌuyaꞌom Rire chwe; ma e kenukꞌastajisaj lo konoje waꞌ chupa ri kꞌisbꞌal qꞌij. 40 Ekꞌu ri lik karaj ri Nuqaw, ri xtaqaw lo weꞌin, e waꞌ: Konoje ri tikawex, ri kakiya ri kiwach wukꞌ ri in Ukꞌajol ri Dios y kakubꞌiꞌ kꞌu kikꞌuꞌx wukꞌ, kakꞌojiꞌ kikꞌaslemal na jinta utaqexik. Ekꞌu riꞌin kenukꞌastajisaj lo chikixoꞌl ri ekaminaq chupa ri kꞌisbꞌal qꞌij —xchaꞌ.

41 Rukꞌ kꞌu riꞌ waꞌ, raj judiꞌabꞌ xkijeq kechꞌaꞌt chirij ri Jesús ruma ri xubꞌiꞌij: «In ri in pam petinaq chilaꞌ chikaj.» 42 Xkibꞌiꞌij kꞌu riꞌ: «¿Na e ta nebꞌa Jesús waꞌ, rukꞌajol ri José? Riꞌoj qetaꞌam uwach ruqaw y qetaꞌam uwach ruchu. ¿Suꞌchak kꞌu riꞌ kubꞌiꞌij petinaq chilaꞌ chikaj?» xechaꞌ.

43 Xubꞌiꞌij kꞌu ri Jesús chike:

—Mixchꞌaꞌtibꞌen chiwach chirij wa ximbꞌiꞌij. 44 Ma na jinta junoq kape wukꞌ riꞌin, we na e ta kꞌamayom lo ri Nuqaw, ri taqayom lo weꞌin. Yey ri kape wukꞌ, kankꞌastajisaj lo chupa ri kꞌisbꞌal qꞌij.

45 »Jewaꞌ kubꞌiꞌij Ruchꞌaꞌtem ri Dios chupa ri tzꞌibꞌital kan kuma ri qꞌalajisanelabꞌ:

47 »Paqatzij wi kambꞌiꞌij che alaq: China ri kakubꞌiꞌ ukꞌuꞌx wukꞌ riꞌin, kꞌo ukꞌaslemal na jinta utaqexik. 48 Ma in ri in pam kuya kꞌaslemal.

49 »Ojertan ri chuꞌqaw alaq xkitij ri maná pa ri luwar katzꞌintzꞌotik; na rukꞌ ta kꞌu riꞌ, rike xekamik. 50 Noꞌj riꞌin e kinchꞌaꞌt chwi ri pam kape chilaꞌ chikaj; yey we kꞌo junoq katijow re waꞌ, riꞌ na kakam taj.

51 »Ri pam re kꞌaslemal petinaq chilaꞌ chikaj e riꞌin. China kꞌu katijow re wa pam, kꞌo ukꞌaslemal na jinta utaqexik. Yey ri pam kanya riꞌin, e ri nutiꞌjil kanya pa kꞌax chaꞌ taq ri tikawex kꞌo kikꞌaslemal chwach ri Dios —xchaꞌ.

52 Ekꞌuchiriꞌ, raj judiꞌabꞌ xkijeq kakichapalaꞌ kibꞌ chikiwach, jewaꞌ kakibꞌiꞌij: «¿Suꞌanik waꞌchi karaj kuya chitijik rutiꞌjil chiqe?» kechaꞌ.

53 Ri Jesús xubꞌiꞌij chike:

—Paqatzij wi kambꞌiꞌij che alaq: We e laꞌ na katij ta alaq ri nutiꞌjil ri in Alaxel Chikixoꞌl Tikawex y we na katij ta alaq ri nukikꞌel, riꞌ na jinta kꞌaslemal alaq. 54 China kꞌu ri kutij ri nutiꞌjil y ri nukikꞌel, riꞌ kꞌo ukꞌaslemal na jinta utaqexik, yey riꞌin kankꞌastajisaj lo chupa ri kꞌisbꞌal qꞌij. 55 Ma ri nutiꞌjil e saqil waꞌim y ri nukikꞌel e saqil yaꞌ. 56 China kꞌu ri kutij ri nutiꞌjil y kutij ri nukikꞌel, riꞌ kakꞌojiꞌ wukꞌ y riꞌin kinkꞌojiꞌ rukꞌ rire.

57 »Ri Qaqaw Dios, ri aj yaꞌl kꞌaslemal, e ri xtaqaw lo weꞌin; yey kꞌo nukꞌaslemal ruma Rire. Jekꞌulaꞌ china ri kutij ri nutiꞌjil riꞌin, riꞌ kꞌo ukꞌaslemal wuma riꞌin. 58 Kinchꞌaꞌt chwi ri pam petinaq chilaꞌ chikaj. Waꞌ na e ta pachaꞌ ri maná xkitij ri chuꞌqaw alaq ojertan. Ma tobꞌ xkitij ri maná, rike xekamik. Noꞌj china ri kutij re wa pam kambꞌiꞌij riꞌin, riꞌ kꞌo ukꞌaslemal na jinta utaqexik —xchaꞌ.

59 E kꞌutunik waꞌ xuꞌan ri Jesús pa kimolom wi kibꞌ chupa ri sinagoga re Capernaúm.

60 Echiriꞌ xkita ri kꞌutunik xuꞌan ri Jesús, lik e kꞌi chike rutijoꞌn xkibꞌiꞌij: «Waꞌ wa kubꞌiꞌij, lik kꞌax utayik. ¿Kꞌo nebꞌa junoq kachꞌijow ukꞌulik?» xechaꞌ.

61 Ekꞌu ri Jesús xunaꞌbꞌej ri chꞌaꞌtibꞌenik kakiꞌan chwi rukꞌutunik. Xutzꞌonoj kꞌu chike:

—¿Kuꞌan kꞌax waꞌ che alaq? 62 ¿Saꞌ kꞌu riꞌ ri kaꞌan alaq we ta e laꞌ kil alaq Ralaxel Chikixoꞌl Tikawex kaqꞌan chilaꞌ chikaj pa petinaq wi? 63 Ri saqil kꞌaslemal na jinta utaqexik petinaq rukꞌ ri Ruxlabꞌixel ri Dios; na e ta ri petinaq xa rukꞌ ri tikawex, ma riꞌ na jinta uchak re kuya ri saqil kꞌaslemal. Ekꞌu ri chꞌaꞌtem nubꞌiꞌim riꞌin che alaq, waꞌ petinaq rukꞌ ri Ruxlabꞌixel ri Dios, ri aj yaꞌl kꞌaslemal. 64 Pero e kꞌo kꞌu jujun chixoꞌl alaq na kubꞌul ta kikꞌuꞌx wukꞌ —xchaꞌ. Ri Jesús xubꞌiꞌij waꞌ ma xex chi retaꞌam wi china taq ri na kubꞌul ta kikꞌuꞌx rukꞌ y china ri kakꞌayin re.

65 Xubꞌiꞌij tanchi ri Jesús:

—Ekꞌu uwariꞌche nubꞌiꞌim che alaq: Na jinta junoq kape wukꞌ, we na e ta ri Nuqaw kꞌamayom lo re —xchaꞌ.

66 Chwi kꞌu riꞌ, e kꞌi chike rutijoꞌn ri Jesús xkiya kanoq y na xeterej ta chi chirij.

67 Ekꞌuchiriꞌ, xutzꞌonoj ri Jesús chike ri kabꞌlajuj utijoꞌn:

—¿Kiwaj nebꞌa riꞌix kiꞌan iwe kiniya kanoq, pachaꞌ ri xkiꞌan rike? —xchaꞌ.

68 Ri Simón Pedro xukꞌul uwach:

—Qajawal, ¿china chi chirij kojꞌek wi? Ma xew ukꞌ rilal kꞌo ri chꞌaꞌtem kuya kꞌaslemal na jinta utaqexik. 69 Riꞌoj lik kubꞌul chi qakꞌuꞌx ukꞌ la y lik qetaꞌam waꞌ: Lal Ruchaꞌoꞌn lo ri Dios, Rukꞌajol ri Dios kꞌaslik —xchaꞌ.

70 Ri Jesús xukꞌul uwach:

—¿Na in ta nebꞌa inchaꞌyom iwe riꞌix ix kabꞌlajuj? Na rukꞌ ta kꞌu riꞌ, jun chiwe kꞌo ritzel winaq pa ranimaꞌ —xchaꞌ.

71 Echiriꞌ xubꞌiꞌij waꞌ, ri Jesús e xchꞌaꞌt puwi ri Judas aj Iscariot* “Iscariot”: Waꞌ e utinamit ri Judas. rukꞌajol ri Simón; ma e ri Judas kakꞌayin re, tobꞌ e jun chike ri kabꞌlajuj utijoꞌn.