1 Xikꞌow na kꞌu kajlajuj junabꞌ echiriꞌ xinꞌek tanchi Jerusalem rukꞌ ri Bernabé, yey xinkꞌam bꞌi ri Tito qukꞌ. 2 Xinꞌek kꞌut, ma ri Dios xuqꞌalajisaj chwe chirajawaxik kinopon chilaꞌ. Xqamol kꞌu qibꞌ xew kukꞌ ri e aj wach re riglesia y xinqꞌalajisaj chikiwach ri Utzilaj Tzij kantzijoj chike ri na e ta aj judiꞌabꞌ. E xinꞌan waꞌ chaꞌ janipa ri nuꞌanom chik y taq ri kintajin che uꞌanik na kasach ta uwach. 3 Wachbꞌiꞌil kꞌu ri Tito yey rire na e ta kukꞌil ri e aj judiꞌabꞌ; na rukꞌ ta kꞌu riꞌ, ri e aj wach re riglesia na xkitaq tane che rire kukoj ri retalil re circuncisión.

4 Xqamol kꞌu qibꞌ kukꞌ wa e aj wach, ma e kꞌo jujun na e ta saqil hermanos xkimin kibꞌ chiqaxoꞌlibꞌal riꞌoj chaꞌ e kakikꞌakꞌalej ri qabꞌinik qasilabꞌik ri oj re ri Cristo, ri Jun xojresaj lo chuxeꞌ ri taqanik ke raj judiꞌabꞌ. Xkiꞌan waꞌ xa re kakaj kojkꞌojiꞌ pakiqꞌabꞌ rike. 5 Pero riꞌoj na xqataqej ta kꞌana ri kakibꞌiꞌij chaꞌ jelaꞌ na kajalkꞌataj ta ri Qꞌijsaq re ri Utzilaj Tzij kojom chi alaq.

6 E taq kꞌu raj wach re riglesia ri lik kꞌo kiwach, tobꞌ na jinta kꞌo kuꞌan chwe riꞌin we ri petinaq loq kꞌo kiwach o na jintaj ma chwach ri Dios xa jun qawach; rike na jinta juna kꞌakꞌ tzij xkikoj puwi ri nukꞌutunik riꞌin. 7 Y na xew ta waꞌ, ma xkimaj usukꞌ e ri Dios xyaꞌw panuqꞌabꞌ riꞌin rutzijoxik ri Utzilaj Tzij chike ri na e ta aj judiꞌabꞌ, jelaꞌ pachaꞌ xyaꞌiꞌ che ri Pedro rutzijoxik waꞌ chike ri e aj judiꞌabꞌ.* “Ri e aj judiꞌabꞌ”: Pa ri chꞌaꞌtem griego kubꞌiꞌij “ri e re ri circuncisión”. 8 Ma ri Dios, ri xutaq bꞌi ri Pedro re kuꞌana utaqoꞌn chikixoꞌl ri e aj judiꞌabꞌ, e xtaqaw bꞌi weꞌin re kinuꞌana utaqoꞌn chikixoꞌl ri na e ta aj judiꞌabꞌ. 9 Ekꞌu ri Jacobo, ri Pedro y ri Juan, ri lik kꞌo kiwach pa riglesia, xkimaj usukꞌ e ri Dios yaꞌyom wa jun chak chwe. Xkiya kꞌu riꞌ ri kiqꞌabꞌ chwe riꞌin y che ri Bernabé, kꞌutubꞌal re oj chi kachbꞌiꞌil rike. Y xukꞌul kikꞌuꞌx kojchakun riꞌin y ri Bernabé chikixoꞌl ri na e ta aj judiꞌabꞌ, yey rike e kechakun chikixoꞌl ri e aj judiꞌabꞌ. 10 Xew kꞌu lik xkitzꞌonoj chiqe na keqameskꞌutaj ta ri e nibꞌaꞌibꞌ y waꞌ lik e kacha nukꞌuꞌx che uꞌanik.

11 Na rukꞌ ta kꞌu riꞌ, echiriꞌ ri Pedro xkꞌun pa ri tinamit Antioquía, riꞌin e laꞌ chiwachil lik ko xinchꞌaꞌbꞌej upa ruma ri na usukꞌ taj katajin che uꞌanik. 12 Ma ri Pedro xaqi kawaꞌ kukꞌ ri hermanos na e ta aj judiꞌabꞌ, noꞌj echiriꞌ xekꞌun jujun e petinaq Jerusalem pa riglesia pa kꞌo wi ri Jacobo, xresaj ribꞌ chikij ri na e ta aj judiꞌabꞌ y na xwaꞌ ta chi kukꞌ, ma kuxiꞌij ribꞌ chikiwach ri lik kebꞌok il che ri retalil re circuncisión.† “Ri lik kebꞌok il che ri retalil re circuncisión”: Waꞌ e jujun aj judiꞌabꞌ kikojom chi rubꞌiꞌ ri Cristo pero kakibꞌiꞌij chirajawaxik chike ri na e ta aj judiꞌabꞌ kakikoj ri retalil re circuncisión chaꞌ kekolobꞌetajik. 13 Ekꞌu ri hermanos e aj judiꞌabꞌ xkiꞌan ke rukꞌ ri Pedro, yey ri Bernabé xpachaꞌbꞌ ne kukꞌ waꞌ wa xa kebꞌ kipalaj. 14 Echiriꞌ riꞌin xinwilo na e ta kakiꞌan jelaꞌ pachaꞌ ri kubꞌiꞌij ri saqil kꞌutunik re ri Utzilaj Tzij, jewaꞌ ximbꞌiꞌij che ri Pedro chikiwach konoje ri kimolom kibꞌ: «Rilal, lal kukꞌil raj judiꞌabꞌ yey kaꞌan e la pachaꞌ ri kakiꞌan ri hermanos na e ta aj judiꞌabꞌ y na kataqej ta chi la jujun che ri taqanik ke raj judiꞌabꞌ. ¿Saꞌ kꞌu uchak riꞌ kabꞌiꞌij rilal chike ri na e ta aj judiꞌabꞌ chirajawaxik kakitaqej wa taqanik ke ri e aj judiꞌabꞌ?»

15 Ri oj aj judiꞌabꞌ, chwi qalaxik loq, na oj ta aj palajiy tzij pachaꞌ ri jujun chik tinamit na jinta Rutzij Upixabꞌ ri Dios kukꞌ. 16 Na rukꞌ ta kꞌu riꞌ, qetaꞌam na jinta junoq kuꞌan jusukꞌ che ribꞌ ruma kutaqej ri taqanik ke raj judiꞌabꞌ; ma ri lik chirajawaxik wi e ri kubꞌulibꞌal kꞌuꞌxaj rukꞌ ri Qanimajawal Jesucristo. E uwariꞌche riꞌoj xqakoj rubꞌiꞌ chaꞌ jelaꞌ Rire kuꞌan jusukꞌ chiqe xew ruma ri kubꞌulibꞌal qakꞌuꞌx rukꞌ y na ruma ta ri kaqataqej juna tzij pixabꞌ. Ma na jinta junoq kuꞌan jusukꞌ che ribꞌ ruma kutaqej ri taqanik ke raj judiꞌabꞌ. 17 Ekꞌu riꞌoj lik kaqaj kojuꞌan jusukꞌ chwach ri Dios xew ruma ri kubꞌulibꞌal qakꞌuꞌx rukꞌ ri Cristo; yey we chikiwach kꞌu jujun chik, oj aj mak ruma na kaqataqej ta chi ri kitaqanik rike, ¿e nawi keꞌeloq kojuꞌana aj mak ruma ri kubꞌulibꞌal qakꞌuꞌx rukꞌ ri Cristo? ¡Na e ta riꞌ! 18 Ma we kankꞌosoj tanchi lo uwach ri nukꞌaqom chubꞌi, riꞌ e keꞌeloq in jun aj palajiy tzij. 19 Riꞌin xinya wibꞌ che uꞌanik ronoje ri taqanik ke raj judiꞌabꞌ chaꞌ jelaꞌ kanꞌan jusukꞌ che wibꞌ, pero xinmaj usukꞌ na ruma ta waꞌ kuꞌan jusukꞌ junoq chwach ri Dios; ekꞌu woꞌora nuyaꞌom wibꞌ che uloqꞌnimaxik ri Dios rukꞌ ronoje ri nukꞌaslem.

20 Jekꞌulaꞌ, ri nukꞌaslemal na weꞌin ta chik, ma e re ri Qanimajawal Jesucristo. E pachaꞌ xinkam chwa ri cruz junam rukꞌ ri Cristo. Woꞌora che ri nukꞌaslem, ronoje ri kanꞌano e ruma ri kubꞌulibꞌal nukꞌuꞌx rukꞌ Rukꞌajol ri Dios, ri lik kꞌax xinunaꞌo y xuya ribꞌ pa kamik wuma riꞌin. 21 Na kuaj ta kꞌut kankꞌaq bꞌi uqꞌij ri unimal rutzil ukꞌuꞌx ri Dios; ma we ta kꞌo junoq kuriqo kuꞌan jusukꞌ che ribꞌ chwach ri Dios ruma utaqem ri tzij pixabꞌ, riꞌ na jinta kutiqoj rukamik ri Cristo.