1 Riꞌin, Simón Pedro, in jun aj chak y taqoꞌn re ri Qanimajawal Jesucristo. Kantzꞌibꞌaj pan wa carta che alaq, janipa ri yaꞌtal che alaq kakubꞌiꞌ kꞌuꞌx alaq rukꞌ ri Cristo jelaꞌ pachaꞌ qaꞌanom riꞌoj. Waꞌ wa chomilaj kubꞌulibꞌal kꞌuꞌxaj xyaꞌ chiqe qonoje ruma ri qa Dios y Kolobꞌenel Jesucristo, ma Rire lik jusukꞌ ri kuꞌan qukꞌ. 2 E lik kꞌiyar na pawiꞌ alaq ri unimal rutzil kꞌuꞌxaj y ri utzil chomal re ri Dios, yey waꞌ kakꞌul alaq ruma etaꞌam alaq uwach ri Dios y ri Qanimajawal Jesucristo.

3 Ri Dios rukꞌ ri unimal uchuqꞌabꞌ, uyaꞌom chiqe ronoje taq ri kajawax che ri qakꞌaslemal y ri qabꞌinik qasilabꞌik chwach Rire. Yey kuꞌan waꞌ ruma ri xuya chiqe kaqetaꞌmaj uwach Rire, ri xojusikꞌij rukꞌ ri unimal uchomalil y ri unimal uwach uqꞌij. 4 Jekꞌuriꞌlaꞌ, ri Dios uyaꞌom nimaꞌq y chom taq bꞌiꞌtisinik chiqe chaꞌ ruma waꞌ kojuꞌana pachaꞌ Rire, ma elinaq lo alaq puqꞌabꞌ ri rayibꞌal na chom ta uwach, ri kakitaqej ri winaq re ruwachulew.

5 Ruma kꞌu xkubꞌiꞌ kꞌuꞌx alaq rukꞌ ri Cristo, chirajawaxik kꞌu riꞌ kachuqꞌubꞌej ibꞌ alaq chaꞌ ri bꞌinik silabꞌik alaq kuꞌan lik jusukꞌ. Y na xew ta waꞌ, ma lik ne chirajawaxik ketaꞌmaj alaq saꞌ ri karaj ri Dios che alaq. 6 We etaꞌam chi kꞌu alaq saꞌ ri karaj ri Dios che alaq, e ꞌana alaq riꞌ. Yey chajij ibꞌ alaq chi utz chaꞌ na katzaq ta alaq pa mak, y jekꞌuriꞌlaꞌ kakꞌojiꞌ unimal kꞌuꞌx alaq. Yey rukꞌ kꞌu ri unimal kꞌuꞌx alaq, e kꞌutu alaq pa saqil wi yaꞌom ibꞌ alaq che jun saqil bꞌinik silabꞌik chwach ri Dios. 7 Y ruma kꞌu lik yaꞌom ibꞌ alaq che jun saqil bꞌinik silabꞌik chwach ri Dios, kꞌax naꞌa ibꞌ alaq chiwach alaq. Yey na xew ta waꞌ, ma lik yaꞌa ibꞌ alaq che ukꞌutik ri rutzil kꞌuꞌx alaq chike konoje.

8 Ma we kꞌo kꞌu taq waꞌ ukꞌ alaq y yaꞌom ibꞌ alaq che uꞌanik taq waꞌ, riꞌ na kok ta xepuyil ukꞌ alaq yey kaqꞌalajin kꞌu riꞌ lik kꞌo kutiqoj ri xetaꞌmaj alaq uwach ri Qanimajawal Jesucristo. 9 Noꞌj e junoq na jinta taq waꞌ rukꞌ, riꞌ e pachaꞌ xew karil ri kꞌo chwach; e junam rukꞌ pachaꞌ juna potzꞌ, ma xikꞌow ne chukꞌuꞌx e rojertan lik aj mak yey e ri Dios xkuyuw umak. 10 E uwariꞌche hermanos, kambꞌiꞌij waꞌ che alaq: E ri Dios xchaꞌw e alaq yey e Rire sikꞌiyom e alaq. Ruma kꞌu riꞌ, chuqꞌubꞌej ibꞌ alaq che ukꞌutik pa ri bꞌinik silabꞌik alaq, paqatzij wi sikꞌim alaq yey chaꞌtal alaq ruma ri Dios. We kaꞌan alaq waꞌ, riꞌ na katzaq ta chi alaq pa mak. 11 Jelaꞌ kꞌu riꞌ lik kakꞌul alaq chi utz pa ri taqanik na jinta utaqexik re ri Qanimajawal y Qakolobꞌenel Jesucristo.

12 Ruma kꞌu riꞌ, na kanwoqꞌotaj ta ukuxtaxik waꞌ che alaq, tobꞌ ne etaꞌam chi alaq wa Qꞌijsaq y jikibꞌam chi kꞌuꞌx alaq che. 13 Ma chinuwach riꞌin, xaloqꞌ kꞌa in kꞌaslik, lik usukꞌ kankoj pa jolom alaq taq wa pixabꞌanik. 14 Ma wetaꞌam ri nukamik xa naqaj chi kꞌo lo wi, yey waꞌ e ri Qanimajawal Jesucristo uqꞌalajisam lo chwe. 15 E uwariꞌche lik inokinaq il che ukuxtaxik waꞌ che alaq, chaꞌ echiriꞌ na in jinta chi ukꞌ alaq, xaqi kakꞌun chikꞌuꞌx alaq ronoje waꞌ.

16 Ma ri kꞌutunik xqaꞌan chiwach alaq chwi ruchuqꞌabꞌ y rukꞌunibꞌal ri Qanimajawal Jesucristo, na e ta rukꞌ nukꞌum chꞌaꞌtem noꞌjital kuma tikawex; ma lik rukꞌ ri qawach xqil runimal uwach uqꞌij Rire. 17 Ma riꞌoj xqilo echiriꞌ xqꞌalajisax runimal uchomalil y lik xyak uqꞌij ruma ri Qaqaw Dios. Xqata ne ruqul ri Dios xchꞌaw chupa ri chomilaj qꞌijsaq kꞌo paqawiꞌ, jewaꞌ xubꞌiꞌij: «E Nukꞌajol waꞌ, ri lik kꞌax kannaꞌo y lik kinkiꞌkot che» xchaꞌ. 18 Xqata kꞌu wa qulaj petinaq chilaꞌ chikaj echiriꞌ oj kꞌo rukꞌ Rire chwa ri santowilaj juyubꞌ.* Mt. 17:1-8; Mr. 9:7; Lc. 9:35 19 Wa xqilo e kujikibꞌaꞌ uwach ri tzij tzꞌibꞌital kan kuma ri qꞌalajisanelabꞌ chupa Ruchꞌaꞌtem ri Dios. Y lik utz ri kaꞌan alaq we kok alaq il che waꞌ, ma e pachaꞌ juna aqꞌ kawon pa qꞌequꞌm kꞌa pa ri saqribꞌal echiriꞌ kel lo ri nimalaj chꞌumil re ri saqribꞌal.* Ap. 22:16 Waꞌ e keꞌelawi rukꞌunibꞌal ri Cristo, ri kutzij upa ri animaꞌ alaq. 20 Lik kꞌut chirajawaxik nabꞌe na kamaj alaq usukꞌ waꞌ: Ri tzꞌibꞌital kan chupa Ruchꞌaꞌtem ri Dios, na utz taj kaqꞌalajisaxik xa rukꞌ unaꞌoj juna achi. 21 Ma ri qꞌalajisam kan chupa Ruchꞌaꞌtem ri Dios, na petinaq ta ruma kinoꞌjibꞌal tikawex, e petinaq ruma ri Santowilaj Ruxlabꞌixel ri Dios. Ma taq ri santowilaj achijabꞌ re ri Dios xechꞌaꞌtik e chirij janipa ri xuqꞌalajisaj ri Ruxlabꞌixel ri Dios chike.