1 Rutzij Upixabꞌ ri Dios jewaꞌ kubꞌiꞌij: «We e kꞌo kebꞌ oxibꞌ kakijikibꞌaꞌ uwach rumak junoq ma xkilo echiriꞌ kamakunik, kaqꞌat kꞌu tzij riꞌ puwi raj mak.»* Dt. 19:15 E urox laj waꞌ kinopon ukꞌ alaq, 2 yey kꞌo kuaj kambꞌiꞌij che onoje alaq y chike ri na koqꞌotam ta kan ri kimak. Waꞌ e ri nubꞌiꞌim chi kan che alaq echiriꞌ xinopon chukalaj ukꞌ alaq y woꞌora kambꞌiꞌij tanchik tobꞌ na in jinta ukꞌ alaq: We xinopon tanchik, na kiꞌntoꞌo ta wiꞌ alaq. 3 Kankꞌut kꞌu riꞌ chiwach alaq ri katzꞌonoj alaq, waꞌ e ri kꞌutubꞌal re we paqatzij wi ri nutzij riꞌin e utzij ri Cristo. Ma Rire na kuxiꞌij ta ribꞌ yey lik kꞌo uchuqꞌabꞌ re kusukꞌupij ri bꞌinik silabꞌik alaq. 4 Paqatzij wi ri Cristo echiriꞌ xkamisax chwa cruz e pachaꞌ na jinta uchuqꞌabꞌ, pero woꞌora Rire kꞌaslik ruma ruchuqꞌabꞌ ri Dios. Jekꞌuriꞌlaꞌ we riꞌoj xa jun qaꞌanom rukꞌ ri Cristo, e pachaꞌ na jinta qachuqꞌabꞌ ruma ri kꞌax kaqatijo, noꞌj kojkꞌasiꞌ ruma ruchuqꞌabꞌ ri Dios kꞌo qukꞌ yey kaqakꞌut na kꞌu riꞌ wa chuqꞌabꞌ echiriꞌ kojopon ukꞌ alaq. 5 Chꞌobꞌo alaq raqan we paqatzij wi kꞌo kꞌutubꞌal re ri kubꞌulibꞌal kꞌuꞌx alaq rukꞌ ri Qanimajawal Jesucristo y kꞌo kꞌu alaq puqꞌabꞌ Rire. ¿Na etaꞌam ta nebꞌa alaq Rire kꞌo pa animaꞌ alaq? ¿O kꞌaxtaj na jinta ne kꞌana kꞌutubꞌal re waꞌ chupa ri bꞌinik silabꞌik alaq? 6 Ekꞌu kuaj riꞌin ketaꞌmaj alaq waꞌ: Che ri qabꞌinik qasilabꞌik kaqꞌalajinik kꞌo ri Cristo pa qanimaꞌ y Rire kakiꞌkot rukꞌ ri qaꞌanom. 7 Kaqatzꞌonoj kꞌu che ri Dios chaꞌ ralaq na katzaq ta kꞌana alaq chupa ri na utz taj. Na kaqatzꞌonoj ta waꞌ re yakbꞌal qaqꞌij riꞌoj, ma xew kaqaj kaꞌan alaq ri utz, tobꞌ e kꞌo ri kakikꞌaq bꞌi qaqꞌij riꞌoj.* “Tobꞌ e kꞌo ri kakikꞌaq bꞌi qaqꞌij riꞌoj”: We ri aj Corinto kakiyijbꞌaꞌ kibꞌ, na kajawax ta chik kaqꞌat tzij pakiwiꞌ. We jekꞌulaꞌ riꞌ xuꞌano, laj e kꞌo jujun kakibꞌiꞌij na jinta uchuqꞌabꞌ ri Pablo ma na xuqꞌat ta tzij pakiwiꞌ jelaꞌ pachaꞌ ri ubꞌiꞌim loq. 8 Ma riꞌoj na jinta paqaqꞌabꞌ kaqakꞌaq bꞌi kiqꞌij ri kebꞌin chupa ri Qꞌijsaq. Ri kaqaꞌano e kojchakun ne ruma ri Qꞌijsaq chaꞌ konoje kebꞌin chupa. 9 E uwariꞌche lik kojkiꞌkot che we kakꞌojiꞌ chuqꞌabꞌ ralaq che uꞌanik ri utz, tobꞌ kilitaj kꞌut pachaꞌ e na jinta chi qachuqꞌabꞌ riꞌoj. Kaqatzꞌonoj kꞌu che ri Dios chaꞌ e kuchomaj chi utz ri bꞌinik silabꞌik alaq. 10 Ruma kꞌu waꞌ, kintzꞌibꞌan apanoq xaloqꞌ kꞌamajaꞌ kinopon ukꞌ alaq, chaꞌ we xinoponik, na kajawax ta chi kꞌax kinchꞌaw pawiꞌ alaq. Ma ri chak uyaꞌom ri Dios chwe e re kꞌiyibꞌal alaq, na re ta sachibꞌal wach alaq.

11 Kꞌisbꞌal kꞌu re hermanos, kambꞌiꞌij waꞌ che alaq: Kꞌola kiꞌkotemal pa animaꞌ alaq, sukꞌupij ri bꞌinik silabꞌik alaq chwach ri Dios, nimarisaj kꞌuꞌx alaq chiwach alaq, chuꞌana xa jun kꞌuꞌx alaq y kꞌola alaq chi utzil chomal. Y ekꞌu ri Dios, ri aj yaꞌl utzil chomal y rutzil kꞌuꞌxaj, kakꞌojiꞌ ukꞌ alaq. 12 Yaꞌa rutzil wach alaq chiwach alaq rukꞌ jun saqil tzꞌubꞌuj chiꞌaj chwach ri Dios.† Ri Pablo jewaꞌ xubꞌiꞌij ma rike e kakiꞌan waꞌ chikiwach echiriꞌ kakiya rutzil kiwach. 13 Konoje ri hermanos wara kakiya pan rutzil wach alaq. 14 Kꞌulu kꞌu onoje alaq ri unimal rutzil ukꞌuꞌx ri Qanimajawal Jesucristo y ri rutzil ukꞌuꞌx ri Dios, yey chuꞌana xa jun kꞌuꞌx alaq ruma ri Santowilaj Ruxlabꞌixel. Amén.