1 Hermanos, echiriꞌ kꞌo junoq che alaq kukoj umak juna chik hermano, ¿suꞌbꞌe kuꞌyaꞌa waꞌ chwa juna aj qꞌatal tzij na bꞌare ta kukꞌil rutinamit ri Dios? Ma ri lik ubꞌe e kayijbꞌaꞌ alaq waꞌ chikiwach rutinamit ri Dios. 2 ¿Na etaꞌam ta nebꞌa alaq kopon jun qꞌij rutinamit ri Dios kakiqꞌat ne tzij pakiwi ri e kꞌo che ruwachulew? We kopon kꞌu waꞌ wa qꞌij echiriꞌ kaqꞌat alaq tzij pakiwi ri e kꞌo che ruwachulew, ¿na jinta kami paqꞌabꞌ alaq riꞌ kaqꞌat alaq tzij puwi ri lik na il ta uwach kꞌo woꞌora? 3 ¿Na etaꞌam ta nebꞌa alaq kopon jun qꞌij echiriꞌ ri oj ralkꞌoꞌal ri Dios kaqaqꞌat ne tzij pakiwi ri ángeles na e ta jusukꞌ? We ekꞌu riꞌ, lik taqal che alaq kariq alaq uyijbꞌaxik woꞌora ri chꞌaꞌoj kawinaqir chixoꞌlibꞌal alaq wara che ruwachulew. 4 We kꞌo kꞌu chꞌaꞌoj chiwach alaq puwi ri xa re ruwachulew, ¿suꞌbꞌe keꞌek alaq chikiwach e aj qꞌatal tzij na jinta kꞌana ke che rutinamit ri Cristo? 5 Kambꞌiꞌij kꞌu waꞌ chaꞌ kakꞌix kꞌana alaq che. Hermanos, ¿na jinta kami junoq che alaq kꞌo unaꞌoj chaꞌ kuyijbꞌaꞌ ri chꞌaꞌoj kawinaqir chixoꞌlibꞌal alaq? 6 ¿Utz nebꞌa laꞌ we kꞌo chꞌaꞌoj chikixoꞌl ri hermanos yey kakikꞌam kꞌu bꞌi waꞌ chwa juna aj qꞌatal tzij na retaꞌam ta uwach ri Dios? ¡Na utz taj!

7 Kꞌo chꞌaꞌoj chiwach ralaq y waꞌ e kꞌutubꞌal re lik na utz ta ꞌanom alaq. Ma ri lik ubꞌe e kakuy alaq ri na usukꞌ taj kaꞌan chiꞌij alaq tobꞌ ne kaꞌan eleqꞌ che alaq rukꞌ sokosoꞌnik. 8 Noꞌj ralaq e kaꞌan alaq ri na ubꞌe taj y kaꞌan ne alaq eleqꞌ rukꞌ sokosoꞌnik, ¡yey waꞌ chike ri jujun chik hermanos kaꞌan wi alaq! 9 ¿Na etaꞌam ta nebꞌa alaq hermanos, e ri na jusukꞌ ta ri kibꞌinik kisilabꞌik na jinta ke kukꞌ ri kebꞌok chupa rutaqanik ri Dios? Lik masokotaj alaq; ma e janipa ri kaketzꞌabꞌej uwa kiqꞌij kukꞌ jujun chik na kikꞌulel taj, ri e aj tioxabꞌ, ri kemakun chirij ri kꞌulanikil, rachijabꞌ kakiꞌan che kibꞌ pachaꞌ e ixoqibꞌ, rachijabꞌ kakiꞌan kikꞌulel chike kach achijabꞌ, 10 ri eleqꞌomabꞌ, ri lik keꞌek kikꞌuꞌx rukꞌ ri puaq, ri kakiya kibꞌ che qꞌabꞌarik, ri e chꞌaminel, ri kꞌo kakimaj chike jujun chik rukꞌ sokosoꞌnik; konoje taq kꞌu waꞌ na jinta ke kukꞌ ri kebꞌok chupa rutaqanik ri Dios. 11 E kꞌo kꞌu jujun che alaq rojertan e kꞌo chupa taq waꞌ wa mak. Noꞌj woꞌora chꞌajtal chi alaq che ri mak, yaꞌtal chi alaq puqꞌabꞌ ri Dios chaꞌ kabꞌin alaq jusukꞌ chwach, yey uꞌanom kꞌu che alaq na jinta chi mak alaq chwach ri Dios. Y ronoje waꞌ e ruma kojom alaq rubꞌiꞌ ri Qanimajawal Jesucristo y ruma ri uꞌanom ri Ruxlabꞌixel ri qa Dios pa animaꞌ alaq.

12 E kꞌo ri kebꞌiꞌn re: «Panuqꞌabꞌ kꞌo wi kanꞌan saꞌ ri kuaj kanꞌano» kechaꞌ. Qatzij, pero na ronoje ta kꞌut taqal chwe kanꞌano. «Panuqꞌabꞌ kꞌo wi kanꞌan saꞌ ri kuaj kanꞌano» kechaꞌ. Na rukꞌ ta kꞌu riꞌ, na kanya ta luwar che ri rayinik re ri nucuerpo kataqan panuwiꞌ. 13 E kꞌo jujun chik kakibꞌiꞌij: «Ri kaqatijo e uwach re ri qapa yey ri qapa e uwach kukꞌul ri kaqatijo» kechaꞌ. Noꞌj kꞌo jun qꞌij echiriꞌ ukabꞌichal waꞌ kasach uwach ruma ri Dios. Ekꞌu ri qacuerpo na re ta kaqetzꞌabꞌej uwa uqꞌij rukꞌ chꞌulilaj mak, ma ri qacuerpo e re ri Qanimajawal y puqꞌabꞌ ri Qanimajawal kꞌo wi. 14 Chwach kꞌu riꞌ ri Dios, lik kꞌo uwach ri qacuerpo. Ma jelaꞌ pachaꞌ xuꞌan ri Dios che ri Qanimajawal echiriꞌ xukꞌastajisaj lo chikixoꞌl ri ekaminaq rukꞌ ruchuqꞌabꞌ, jekꞌulaꞌ kuꞌan chiqe riꞌoj chiqawach apanoq. 15 ¿Na etaꞌam ta kami alaq riꞌ, ri cuerpo alaq xa jun uꞌanom rukꞌ rucuerpo ri Qanimajawal Jesucristo? ¿Utz nawi we riꞌin in re ri Cristo yey kanwesaj bꞌi wibꞌ puqꞌabꞌ Rire y kanyoj kꞌu wibꞌ rukꞌ juna ixoq xaqi kamakun kukꞌ achijabꞌ? ¡Lik na utz ta riꞌ! 16 ¿O na etaꞌam ta kami alaq echiriꞌ juna achi kuyoj ribꞌ rukꞌ juna ixoq xaqi kamakun kukꞌ achijabꞌ, waꞌ kuꞌana xa jun rukꞌ? Ma jewaꞌ tzꞌibꞌital kan chupa ri Tzij Pixabꞌ re ri Dios: Rachi y rixoq echiriꞌ kakijunimaj kibꞌ, «kikabꞌichal kebꞌuꞌana xa e jun chwach ri Dios»* Gn. 2:24 kachaꞌ. 17 Jekꞌulaꞌ we kꞌo juna tikawex kuya ribꞌ puqꞌabꞌ ri Qanimajawal, kuꞌan xa jun ukꞌuꞌx rukꞌ.

18 Kambꞌiꞌij kꞌu waꞌ che alaq: Lik chajij ibꞌ alaq chaꞌ na katzaq ta alaq pa ri mak kuꞌan jun echiriꞌ karetzꞌabꞌej uwa uqꞌij rukꞌ jun chik na ukꞌulel taj. Ma ri jujun chik mak na karetzelaj ta ri cuerpo pachaꞌ wa jun mak, yey we jun kuꞌan waꞌ, riꞌ chirij rucuerpo kamakun wi. 19 ¿Na etaꞌam ta nebꞌa alaq, ri cuerpo alaq e rocho ri Ruxlabꞌixel ri Dios? Ma ri Dios uyaꞌom ri Santowilaj Ruxlabꞌixel che alaq chaꞌ kajeqiꞌ pa animaꞌ alaq. Y ruma kꞌu laꞌ, na alaq ta chi rajaw ri kꞌaslemal alaq. 20 Alaq chi re ri Dios, ma Rire xuloqꞌ alaq rukꞌ rukamik ri Qanimajawal.* Ef. 1:7 Ekꞌu uwariꞌche, yaka alaq uqꞌij ri Dios rukꞌ ri cuerpo alaq y rukꞌ ronoje animaꞌ alaq, ma ukabꞌichal waꞌ, re ri Dios.