1 Lik chirajawaxik wi konoje ri tikawex kaketaꞌmaj e riꞌoj xa oj toꞌbꞌel pa ruchak ri Cristo, y yaꞌtal kꞌu chiqe kaqakꞌut saꞌ ri karaj kuqꞌalajisaj ri Dios chike ri tikawex. 2 Jelaꞌ pachaꞌ lik chirajawaxik che juna aj chak lik kuchapabꞌej chi utz ri yaꞌom puqꞌabꞌ ruma ri rajaw; jekꞌulaꞌ riꞌ chirajawaxik kaqaꞌan riꞌoj rukꞌ ri yaꞌtal paqaqꞌabꞌ ruma ri Qajawal. 3 Ekꞌu riꞌin na kinok ta il che taq ri kabꞌiꞌij alaq che ri chak nuꞌanom, we utz o na utz taj. Na kinok tane il che taq ri kakibꞌiꞌij ri tikawex che waꞌ. Yey na ubꞌe tane chwe riꞌin kambꞌiꞌij we utz ri chak nuꞌanom. 4 Ma kannaꞌ chinukꞌuꞌx e kintajin che uꞌanik ri karaj ri Qanimajawal; na rukꞌ ta kꞌu riꞌ, xew che Rire taqal wi kubꞌiꞌij we utz o na utz ta ri chak nuꞌanom. 5 E uwariꞌche maqꞌat tzij alaq pakiwi ri raj chak ri Dios, we kꞌo kutiqoj o na jinta kutiqoj ri chak kiꞌanom; e choyeꞌej alaq rukꞌunibꞌal ri Qanimajawal Jesucristo, ma echiriꞌ kakꞌun Rire, kuqꞌalajisaj ronoje ri kꞌamajaꞌ ketaꞌmaxik. Kꞌa ekꞌuchiriꞌ kaqꞌalajinik saꞌ ri kꞌo pa kanimaꞌ ri tikawex. Y chikijujunal kꞌut kakikꞌul che ri Dios ri yakbꞌal kiqꞌij e chirij ri kiꞌanom.

6 Hermanos, rukꞌ ri kꞌambꞌal naꞌoj nuyaꞌom lo chwi ri Apolos y panuwi riꞌin, xuaj kampixabꞌaj alaq chaꞌ kamaj alaq uyakik kiqꞌij ri tikawex xew e chirij ri tzꞌibꞌital kan chupa Rutzij Upixabꞌ ri Dios puwi ri yaꞌtal che alaq kaꞌan alaq. Ma we jelaꞌ kaꞌan alaq, na jinta kꞌo ri kuꞌan nim che ribꞌ ruma utaqem junoq yey e kukꞌaq bꞌi kiqꞌij ri nikꞌaj chik.* 1 Co. 3:19-23 7 We kꞌo junoq uꞌanom nim che ribꞌ chixoꞌlibꞌal alaq, kantzꞌonoj che: «¿Suꞌchak kachꞌobꞌ la e lik kꞌo wach la chikiwa ri nikꞌaj chik? ¿Kꞌo nawi majom la xa tukel la? Jintaj, ma janipa ri kꞌo ukꞌ la y ri majom la, e ri Dios yaꞌyom cheꞌla. Y we xa yaꞌtal cheꞌla, ¿suꞌchak kꞌu riꞌ katakꞌabꞌaꞌ qꞌij la?»

8 Ralaq kanaꞌ alaq pachaꞌ na jinta chi kꞌo kajawax che alaq. E kanaꞌ ralaq alaq chi bꞌeyom y alaq chi nimaq taqanelabꞌ; yey na kajawax ta chi ne ri toꞌbꞌal qeꞌoj che alaq. Lik chom kꞌut we ta pa saqil wi ꞌanom chi taqanelabꞌ che alaq ruma ri Dios chaꞌ junam kojtaqan ukꞌ alaq.

9 Noꞌj chinuwach riꞌin, ri oj utaqoꞌn ri Jesús na jinta ko qawach. Ma ri Dios oj ukojom oj kꞌisbꞌal chike ri tikawex. E pachaꞌ oj kꞌo chuxeꞌ qꞌatbꞌal tzij re kamik y kojkꞌam bꞌi re kojkamisaxik, yey konoje xa kojkitzutzaꞌ chik, tobꞌ tikawex, tobꞌ ne ángeles. 10 E riꞌoj ruma qataqem ri Cristo kabꞌiꞌx chiqe sachinaq qanaꞌoj; noꞌj ralaq kachꞌobꞌ alaq raqan lik kꞌo naꞌoj alaq chikiwa ri jujun chik kikojom rubꞌiꞌ ri Cristo. E riꞌoj e pachaꞌ lik na jinta qachuqꞌabꞌ, noꞌj ralaq lik kꞌo chuqꞌabꞌ alaq. E ralaq lik yakom qꞌij alaq, noꞌj riꞌoj lik kꞌaqom bꞌi qaqꞌij. 11 Ekꞌu laꞌ lik qatijom lo numik y tzajin chiꞌ, lik ne na jinta qaqꞌuꞌ. Kojchꞌayik y na jinta qocho pa kojkꞌojiꞌ wi. 12 Lik ne kojkosik ma kojchakun rukꞌ ri qaqꞌabꞌ.* Hch. 18:3 E taq ri winaq kojkiyajo, noꞌj riꞌoj kaqatzꞌonoj ri utz pakiwiꞌ. Echiriꞌ kojternabꞌex rukꞌ kꞌaxkꞌobꞌik, riꞌoj lik kaqakuyu. 13 Echiriꞌ tzel kojkichꞌaꞌtibꞌej, kaqakꞌul uwach rukꞌ chomilaj chꞌaꞌtem. Kꞌa chupa ne waqꞌij ora e pachaꞌ chi oj aqꞌes na jinta uchak che ruwachulew ma lik kꞌaqom bꞌi qaqꞌij kuma ri winaq.

14 Kantzꞌibꞌaj kꞌu ronoje waꞌ na e ta re kanya kꞌix alaq; xa e re kampixabꞌaj alaq ma pachaꞌ alaq walkꞌoꞌal lik kꞌax kannaꞌ alaq. 15 Ma tobꞌ lik e kꞌi ri kekꞌutun chiwach alaq chwi ri Cristo, na rukꞌ ta kꞌu riꞌ, ri qaw alaq na e ta kꞌi, xew riꞌin, ma in ri nabꞌe xintzijoj ri Utzilaj Tzij che alaq yey ruma kꞌu laꞌ, xkoj alaq rubꞌiꞌ ri Cristo y xuꞌana alaq ralkꞌoꞌal ri Dios. 16 Ruma kꞌu waꞌ, kambꞌiꞌij che alaq: ꞌAna e alaq ri nuꞌanom riꞌin rukꞌ ri nubꞌinik nusilabꞌik chwach ri Dios. 17 E uwariꞌche nutaqom bꞌi ukꞌ alaq ri Timoteo, ri lik kꞌax kannaꞌo ma e pachaꞌ nukꞌajol chupa rubꞌiꞌ ri Cristo. Rire lik kuꞌan chi utz ri taqom che ruma ri Qanimajawal. Echiriꞌ kopon ukꞌ alaq, kuꞌtzijoj tanchi che alaq ri nubꞌinik nusilabꞌik riꞌin rukꞌ ri Cristo, ma jelaꞌ nukꞌutum pa taq chawi in ikꞌowinaq wi y pa taq riglesias.

18 E kꞌo jujun chixoꞌlibꞌal alaq lik kiꞌanom nim che kibꞌ, ma e chikiwa rike na kinopon ta chi riꞌin ukꞌ alaq. 19 Pero na kinmayin ta che kinopon ukꞌ alaq we e karaj riꞌ ri Dios. Yey echiriꞌ kinoponik, kebꞌeꞌnuwila na kꞌu ri kiꞌanom nim che kibꞌ, we paqatzij wi kakiriq uꞌanik janipa ri kibꞌiꞌim. 20 Ma na xa ta rukꞌ chꞌaꞌtem kaqꞌalajin wi we junoq paqatzij wi kꞌo chupa rutaqanik ri Dios, ma e kaqꞌalajin rukꞌ ruchuqꞌabꞌ ri Dios che rubꞌinik usilabꞌik. 21 Kantzꞌonoj kꞌut: ¿Saꞌ ri más utz? ¿Kinopon ukꞌ alaq chaꞌ kiꞌnꞌana juna qꞌilonik lik kꞌax o e kankꞌut ri rutzil nukꞌuꞌx y ri chꞌuꞌchꞌuj nukꞌuꞌx chiwach alaq? Paqꞌabꞌ alaq kꞌo wi.